Noticias

  • Lerner y Winter alderiquen sobre'l futuru de la investigación inmunolóxica na Universidá d'Uviéu

    24 de Ochobre 2012

    Los galardonaos col Premiu Príncipe d'Asturies celebraron un almuerzu de trabayu con espertos nacionales

    Imaxe de los participantes nel alcuentru con Lerner y Winter.

    Los galardonaos col Premiu Príncipe d'Asturies d'Investigación Científica y Técnica, Richard A. Lerner y Gregory Winter, participaron esta mañana nun Almuerzu de trabayu celebráu nel Centru Cultural LAUDEO (Edificiu Históricu) de la Universidá d'Uviéu, con espertos nacionales n'inmunoloxía.

    Los dos científicos fueron recibíos a primer hora de la mañana pol Rector, Vicente Gotor, y la vicerrectora d'Investigación y Campus d'Excelencia Internacional, María Paz Suárez Rendueles, con quien caltuvieron un curtiu alcuentru previu al almuerzu.

    Per espaciu d'hora y media, Lerner y Winter intercambiaron impresiones con investigadores españoles sobre asuntos de máxima actualidá nel so campu como'l futuru de la tecnoloxía aplicada al desenvolvimientu d'anticuerpos o la posibilidá de qu'éstos sían eficaces en patoloxíes intracelulares.

    Amás, dambos investigadores amosaron interés a la de percanciar información sobre les meyores que pueden faese pa llograr que los anticuerpos sían el recursu utilizáu pa garantizar la tolerancia a los ensiertos. Coles mesmes, abarruntaron que nun futuru'l modelu de les biblioteques d'anticuerpos probablemente sígase pa configurar biblioteques de virus.

    Richard A. Lerner y Gregory Winter animaron a los investigadores españoles a siguir trabayando pa sacar alantre nueves idees nel campu de la inmunoloxía a pesar de les dificultaes qu'esisten por que los descubrimientos tomen forma de proyectos concretos.

    Imaxes:


Buscar