Noticias

  • LAUDEO empecipia la so actividá con gran repercusión de los actos de los Premios Príncipe nos medios de comunicación

    27 de Ochobre 2011

    Esposiciones, alcuentros científicos, un recital de poesía y un conciertu formen parte de la programación del Centru Cultural L'Antigua Universidá d'Uviéu

    El Premiu Nobel Paul Nurse, mientres la inauguración de la esposición de la Royal Society

    El Centru Cultural d'Estensión Universitaria LAUDEO (L'Antigua Universidá d'Uviéu) empecipió la so actividá colos actos venceyaos a la celebración de los Premios Príncipe d'Asturies. Les esposiciones, alcuentros científicos y almuerzos de trabayu, en collaboración cola Fundación qu'apurre los galardones, y el recital de poesía y el conciertu n'homenaxe a Leonard Cohen, entamaos pola Universidá, rexistraron gran ésitu de públicu y una importante repercusión nos medios de comunicación rexonales y nacionales.

    A lo llargo de la pasada selmana, l'Edificiu Históricu de la Universidá y el Campus del Milán recibieron la visita de distintos Premios Príncipe d'Asturies que participaron n'actos abiertos a la sociedá.

    La sala central de la Biblioteca acueye la esposición ‘Transacciones. España na hestoria de la Royal Society', qu'el 19 d'ochobre foi inaugurada pol presidente de la institución (galardonada col Premiu Príncipe de Comunicación y Humanidaes) Paul Nurse, premio Nobel de Medicina. Nurse protagonizó esi mesmu día l'alcuentru científicu nel Paraninfu ‘L'universu nun pulgu de nuez. Los grandes retos de la ciencia del futuru', xuntu col presidente del Conseyu Cimeru d'Investigaciones Científiques (CSIC), Rafael Rodrigo, y el catedráticu de Microbioloxía de la Universidá Complutense César Nombela, qu'actuó como moderador.

    La esposición dedicada a la Royal, que va permanecer abierta hasta'l 13 de noviembre, recibió la visita privada de distintos galardonaos comenenciudos en conocer de cerca esta amuesa, ente ellos Arturo Álvarez-Buylla y Robert Altman (Premio Príncipe d'Asturies d'Investigación Científica y Técnica), y representantes de la delegación de los héroes de Fukushima' (Premio Príncipe de la Concordia).

    La Capiya Universitaria y el Paraninfu fueron l'escenariu de tres desayuno de trabayu colos premiaos n'Investigación Científica y Técnica Giacomo Rizzolatti y Arturo Álvarez-Buylla, y en Ciencies Sociales, Howard Gardner.

    Nel campus del Milán, el Premiu Príncipe d'Asturies de les Lletres, Leonard Cohen, inauguró'l 21 d'ochobre la esposición ‘Cohen. La cara B. Dibuxos y grabaos d'un artista multidisciplinar' y recibió l'homenaxe de cientos d'universitarios na Facultá de Filosofía y Lletres. Esi mesmu día, el Salón d'Actos del Campus d'Humanidaes acoyó un multitudinariu recital de poesía, entamáu por Estensión Universitaria y l'Aula de les Metáfores', con Niall Binns y Fernando Beltrán como protagonistes.

    Los artistes que protagonizaron la esplosión musical de los 90 dende'l Campus del Milán celebraron, el 21 d'ochobre nel Paraninfu, el conciertu ‘First we take Milán', un homenaxe a Leonard Cohen y un emotivu realcuentru d'antiguos estudiantes cola Universidá. Pa los que nun pudieron asistir a esti conciertu únicu y bien especial, la Universidá d'Uviéu, en collaboración cola Productora de Programes del Principáu d'Asturies y la TPA, va editar un DVD con un documental y un discu en directu.

    Toos estos actos cuntaron con siguimientu de los medios de comunicación al traviés de noticies, reportaxes y entevistes en prensa escrita, medios audiovisuales y publicaciones dixitales especializaes rexonales y nacionales, según nes redes sociales.

    Documentos Rellacionaos:

    Enllaces Rellacionaos:


Buscar