Noticias

  • Les IV Xornaes Doctorales de la Universidá d'Uviéu atraen a más de 300 mozos investigadores

    11 de Avientu 2014

    L'alcuentru, celebráu nel Campus de Mieres, dobló'l númberu de participantes y esibió 116 pósteres col trabayu de doctorandos de toles cañes de la conocencia

    El númberu de participantes na esposición de pósteres rexistró una medría notable y algamó un total de 116 exemplares.

    Los mozos investigadores de la Universidá d'Uviéu van trazando les llínees del futuru de la ciencia asturiana nes IV Xornaes Doctorales de la Universidá d'Uviéu, qu'anguaño doblaron la participación con al respective de ediciones anteriores. Un total de 320 doctorandos diéronse cita nel alcuentru celebráu nel Campus de Mieres, onde s'espunxeron 116 pósteres que sinteticen el trabayu que desenvuelven pa ellaborar les sos tesis doctorales.

    El rector de la Universidá d'Uviéu, Vicente Gotor, foi l'encargáu d'inaugurar les IV Xornaes Doctorales al pie de la directora del Centru Internacional de Posgráu, Carmen Bermeyu, y Asunción Cámara, directora de la Escuela Politécnica de Mieres. "Sois el presente y el futuru", afirmó'l rector ante un auditoriu prácticamente apináu al que recordó que'l doctoráu supon "un valor añedíu bien importante". Vicente Gotor eponderó l'altu nivel de la investigación desenvuelta dientro de la institución académica asturiana que rexistró nos últimos años una medría del 40 per cientu en publicaciones científiques de máximu impactu. "La Universidá precisa un relevu xeneracional que ta na cazumbre nueva de el doctores", concluyó'l rector.

    L'antepar de la Escuela Politécnica de Mieres acoyó l'amuesa de 116 pósteres que recueyen el conteníu de les investigaciones de bona parte de los participantes nes xornaes. Un xuráu d'espertos premió'l trabayu de Ramón Díaz Noriega nel so póster Desenvolvimientu metodolóxicu pa la caracterización geotérmica de mines soterrañes, conceptualización y modelización numbérica. Les votaciones del públicu asistente reconocieron el póster tituláu Disolventes eutécticos de baxu puntu de fusión (Deep Eutectic Solvents, DEAS): Nuevos disolventes biorenovables en procesos de síntesis orgánica catalizados por complexos de transición, diseñáu por Christian Vidal Vides.

    El númberu de participantes na esposición de pósteres rexistró una medría notable con una trentena de pósteres. Doctorandos de toles cañes de la conocencia tomaron parte na amuesa na que s'espunxeron 33 pósteres de la área de Ciencies, 27 d'Arte y Humanidaes, 26 de Ciencies Xurídicu Sociales, 16 de Ciencies de la Salú y 14 de la caña d'Inxeniería y Arquitectura.

    Les IV Xornaes Doctorales, entamaes pel Centru Internacional de Posgráu, asítiense como un puntu d'alcuentru ente mozos investigadores pa poder conocer de primera les llínees d'investigación que siguen otros doctorandos. Amás, el programa de talleres y ponencies ufierta la posibilidá de trabayar conjuntamente recursos y habilidaes que faciliten la tresferencia de resultancies d'investigación a la sociedá.

    Les vicerrectoras d'Investigación y Campus d'Excelencia Internacional, Paz Suárez Rendueles, y Internacionalización y Posgráu, Cuadonga Betegón, cerraron l'alcuentru acompañaes pola directora xeneral d'Universidaes del Principáu, Miriam Cueto, quien destacó'l compromisu del gobiernu rexonal colos recursos humanos dedicaos a la ciencia.

    Imaxes:


Buscar