Noticias

  • La Universidá y la OSPA axúntense al centenariu de Britten col programa "Música y Guerra"

    19 de Payares 2013

    La iniciativa inclúi dos conciertos y conferencies p'averase a la obra del compositor inglés nel añu del centenariu de la so nacencia

    D'esquierda a derecha, Ana Mateo, Rossen Milanov, Vicente Domínguez y Esteban Miranda.

    La Orquesta Sinfónica del Principáu d'Asturies y l'Universidá d'Uviéu suman esta selmana a la celebración del centenariu de la nacencia de Benjamin Britten con un programa cultural articuláu alredor del Réquiem de guerra. El maestru Rossen Milanov va dirixir los dos conciertos: el primeru va tener llugar el  próximu vienres, 22 de noviembre, fecha del natalicio del célebre compositor británicu, y el segundu, a otru día, el sábadu 23. Dambos celebraránse nel Auditoriu Príncipe Felipe d'Uviéu a les 20:00 hores.

    La institución académica collabora nesta iniciativa con dos tales conferencies al cargu de María Encina Cortizo, profesora del Departamentu d'Hestoria del Arte y Musicoloxía de la Universidá d'Uviéu. Col títulu "Aciagos tañimientos p'aquellos que muerren como ganáu": el Réquiem de Guerra de Benjamin Britten, la profesora va realizar un acercamientu a esta gran obra sinfónicu-coral el 20 de noviembre a les 20:00 hores, na Aula Magna de LAUDEO Centru Cultural d'Estensión Universitaria, Uviéu; y el 26 de noviembre, a la mesma hora nel salón d'actos del Centru de Cultura Antiguu Institutu, Xixón.

    El programa foi presentáu esta mañana pola xerente de la OSPA, Ana Mateo; el vicerrector d'Estensión Universitaria y Comunicación, Vicente Domínguez; el maestru Rossen Milanov; y el director del Coru de la Fundación Príncipe d'Asturies, José Esteban Miranda. Vicente Domínguez destacó qu'esta iniciativa va tener continuidá con otres collaboraciones en redol al ciclu Música y Guerra que la OSPA programó pa la temporada 13/14.

    El Réquiem de guerra ye una de les obres más importantes del sieglu XX y un destacáu cantar a la paz de Britten. Pa la so interpretación, la OSPA va cuntar con una plantiya ampliada de 86 profesores, y la participación de trés solistes y del Coru de la Fundación Príncipe d'Asturies y la so sección infantil, que suman 124 voces. Los solistes que van participar nesti programa son la sopranu rusa Evelina Dobraceva; el tenor irlandés Robin Tritschler y el barítonu alemán Stephan Genz.

    Un pocu d'hestoria

    El War Requiem naz munchos años dempués de la tarrecible dómina de la II Guerra Mundial, na década de los sesenta, gracies a un encargu. La ciudá de Coventry, oxetivu de masivos bombardeos de la Luftwaffe, ve cómo la so catedral queda destruyida casi per completu la nueche del 14 de noviembre de 1940; por ello, na posguerra decide construyir una nueva y caltener les ruines de l'antigua como símbolu de reconcialización y alcordanza del conflictu.

    El so arquiteutu, Basil Spence, decide cuntar con artesanos y artistes locales na decoración del nuevu templu, y pal so re-consagración encarga una obra nueva a Benjamin Britten, poniendo como única condición que presente una duración d'ente trenta y cuarenta minuto.

    La consagración de la nueva catedral, que tien llugar el 25 de mayu de 1962, desenvuélvese dientro d'un verdaderu festival d'arte. Britten deseyaba que la obra fuera interpretada nos sos papeles solistes por trés intérpretes de tres naciones fuertemente arreyaes na II Guerra Mundial, la sopranu rusa Galina Vishnevskaya, el tenor Peter Pears y el barítonu alemán Dietrich Fischer-Dieskau. Lamentablemente el Gobiernu rusu torgó participar nel estrenu a Vishnevskaya, que foi sustituyida por Heather Harper.

    Pa la composición del War Requiem, Britten emplega'l testu llatinu de la Missa pro defuncis, pero añede, a manera de verdaderu tropu, nueve poemes d'unu de los meyores poetes de la Primer Guerra Mundial, Wilfren Owen. Ésti, que fina en 1918, a los venticinco años d'edá, una selmana antes del final de la guerra, cuando participaba col so batallón nun desembarco en noroeste de Francia, escribe mientres los sos dos últimos años de vida una colección de poemes, "berru desesperáu contra la inhumanidad del home contra l'home" en palabres de Mervyn Cooke.


Buscar