Noticias

  • La Universidá y la Fundación Ópera d'Uviéu axunten a espertos y artistes p'analizar los títulos de la nueva temporada

    10 de Setiembre 2012

    Maestros, directores d'escena, cantantes y profesores universitarios van aldericar cada títulu de la temporada nun ciclu d'alcuentros, que se va celebrar nel centru cultural LAUDEO con entrada llibre

    Jaime Martínez, presidente de la Fundación Ópera d'Uviéu y el vicerrector d'Estensión y Comunicación de la Universidá d'Uviéu, Vicente Domínguez, mientres la presentación.

    La Universidá d'Uviéu y la Fundación Ópera d'Uviéu empecipien una collaboración cola organización conxunta de diverses actividaes en redol a la LXV temporada d'Ópera d'Uviéu.

    La institución académica asturiana y la FOO van programar un ciclu de conferencies abiertu a tola sociedá asturiana nel que cantantes, directores musicales y d'escena, diseñadores, escenógrafos y profesores universitarios van esbillar les claves de cada unu de los títulos de la temporada. Amás, el conveniu de collaboración suscritu ente dambes organizaciones va dexar averar la temporada d'ópera a otres localidaes de la xeografía asturiana, con un programa de retresmisiones en directu auspiciado pola empresa Telecable.

    Los alcuentros van axuntar a los aficionaos al bel canto nel Centru Cultural d'Estensión Universitaria LAUDEO (Edificiu Históricu) mientres les feches de les representaciones de cada títulu. La entrada va ser llibre y gratuita pa tolos comenenciudos en participar nel alderique.

    El primeru de los alcuentros va xirar en redol a les figures de los dos protagonistes principales de Werther, la ópera de Jules Massenet basada na novela de Goethe, qu'abre la temporada. Van Intervenir los cantantes Nancy Fabiola Herrera (Charlotte) y Elena de la Mercé (Sophie). Van Tar acompañaos por Margarita Blanco Hölscher, profesora de Filoloxía Alemana de la Universidá.

    El llabor de divulgación y promoción de la cultura ye otru de los puntos comunes ente la Estensión Universitaria y la FOO. Por ello, dambes instituciones van impulsar un programa de retresmisiones, que va dexar a los vecinos de delles localidaes asturianes esfrutar de los títulos de la LXV temporada.

    Coles mesmes, en virtú del conveniu, grupos d'estudiantes de la Facultá de Filosofía y Lletres van poder asistir a los ensayos xenerales de les óperes, y los alumnos del grau y del máster n'Hestoria y Ciencies de la Música van poder realizar práctiques nes oficines de la Fundación Ópera d'Uviéu.

    PROGRAMA D'ALCUENTROS DE LA LXV TEMPORADA D'ÓPERA D'UVIÉU

    El ciclu d'alcuentros col públicu va cuntar cola presencia de profesionales del mundu operísticu en toles sos disciplines. Ente otros van pasar pol LAUDEO les sopranos Ainhoa Arteta y Elisabete Matos, el directores de escena Emilio Sagi y Mariame Clément o la diseñadora de vestuario Julia Hansen, toos ellos acompañaos por espertos de la Universidá d'Uviéu en música, hestoria, arte o psicoloxía.

    Werther
    Fecha:
    Miércoles 12 de setiembre
    Hora:
    20:00 hores
    Llugar:
    Aula Magna de LAUDEO
    Lucía di Lammermoor
    Fecha:
    Miércoles 10 d'ochobre
    Hora:
    18:30 hores
    Llugar:
    LAUDEO
    Turandot
    Fecha:
    Llunes 19 de noviembre
    Hora:
    18:30 hores
    Llugar:
    LAUDEO
    Agrippina
    Fecha:
    Miércoles 12 d'avientu
    Hora:
    18:30 hores
    Llugar:
    LAUDEO
    Don Carlo
    Fecha:
    Vienres 25 de xineru
    Hora:
    20:00 hores
    Llugar:
    LAUDEO

Buscar