Noticias

  • La Universidá y la Fundación José Cardín roblen un conveniu marco pal espardimientu de la cultura

    11 de Ochobre 2016

    Dambes instituciones van entamar en 2017 unes xornaes sobre Carlos V pa conmemorar los 500 años del so desembarco en Tazones y una esposición sobre Carlos III en collaboración cola Biblioteca Nacional y Casa Real

    Firma del acuerdo de colaboración entre José Cardín y Santiago García Granda.
    La Universidá d'Uviéu y la Fundación José Cardín suscribieron esta mañana un conveniu marco de collaboración pal espardimientu d'actividaes culturales. Roblaron l'alcuerdu'l rector, Santiago García Granda, y el presidente de la fundación, José Cardín. L'actu cuntó tamién cola asistencia del vicerrector d'Estensión Universitaria y Proyección Internacional, Francisco Borge; de la directora d'Área d'Estensión Universitaria, María Álvarez, y de la directora de la Fundación José Cardín, Enriqueta de Valdés.
     
    La collaboración ente dambes instituciones va empezar cola celebración en primavera d'unes xornaes d'Estensión Universitaria sobre la figura de Carlos V del qu'en 2017 van cumplise 500 años del so desembarco en Tazones. Les xornaes, que se van desenvolver en Villaviciosa y n'Uviéu, van cuntar cola presencia de destacaos profesores d'Iberoamérica y España que van encetar aspeutos como la lliteratura, la música, la sociedá o la política nel mundu de Carlos V.
     
    La Universidá d'Uviéu y la Fundación Cardín van entamar tamién una esposición, que se va esibir a la vuelta del branu nel Edificiu Históricu d'Uviéu sobre la figura de Carlos III y la so llegada a España. L'amuesa ye frutu de la collaboración cola Biblioteca Nacional y Casa Real.  
     
    El rector de la Universidá d'Uviéu amosó'l so prestu pola firma d'un alcuerdu que, nes sos palabres, cumple col espíritu de la Estensión Universitaria d'abrir les puertes de la institución a la sociedá asturiana y facer amás de la mano d'una entidá tan importante p'Asturies como la Fundación José Cardín.
     
    El presidente de la fundación refirióse a la Universidá como una plataforma "que nos alza y ayúdanos a espandir la cultura nel ámbitu local, rexonal ya internacional". José Cardín reivindicó amás los valores del mediu rural nel que naz la fundación que lleva'l so nome. "Somos d'aldega. Vivimos na aldega y defendemos los sos valores", indicó.
     
    El vicerrector d'Estensión Universitaria y Proyección Internacional recoyó'l testigu y manifestó qu'unu de los oxetivos del departamentu que dirixe ye faer llegar la cultura a toles aldegues que conformen la sociedá asturiana y non solo a les grandes ciudaes.  
     

    Imaxes:


Buscar