Noticias

  • La Universidá y el Principáu ponen en marcha una Cátedra sobre prevención de riesgos llaborales

    16 de Xunetu 2014

    El rector y el conseyeru d'Economía y Empléu roblen el conveniu de collaboración que va dexar desenvolver actividaes formatives y divulgatives sobre la salú y seguridá nel trabayu

    D'esquierda a derecha: Miryam Hernández, Graciano Torre, Vicente Gotor, Paz Suárez Rendueles y Antonio García Izquierdo

    La Universidá d'Uviéu y la Conseyería d'Economía y Empléu ponen en marcha la Cátedra Asturies Prevención coles mires de desenvolver actividaes formatives y divulgatives sobre la prevención de riesgos llaborales y de fomentar la collaboración ente dambes instituciones nel diseñu de programes d'interés. El rector, Vicente Gotor, y el conseyeru d'Economía y Empléu, Graciano Torre, suscribieron el conveniu que va dexar el desenvolvimientu de la Cátedra, recoyida nel Alcuerdu pol Empléu y el Progresu d'Asturies (AEPA).

    Nel actu tamién participaron la vicerrectora d'Investigación y Campus d'Excelencia Internacional, Paz Suárez Rendueles; la directora del Institutu Asturianu de Prevención de Riesgos Llaborales del Principáu, Miryam Hernández; y el director de la Cátedra, Antonio García Esquierdu.

    El rector de la Universidá d'Uviéu, Vicente Gotor, refirióse a esta nueva cátedra como un elementu estratéxicu dientro de les relaciones institucionales nuna tema tan sensible como la prevención de riesgos llaborales. El rector destacó tamién el compromisu de la institución académica cola investigación nel ámbitu de la salú nel marcu del Campus d'Excelencia Internacional.

    Pela so parte, el conseyeru d'Economía y Empléu, Graciano Torre, destacó l'apueste del Gobiernu asturianu por potenciar la collaboración cola Universidá d'Uviéu pal desenvolvimientu d'iniciatives como esta,  que va impulsar la meyora de la salú y la seguridá nel trabayu por aciu la formación y la divulgación d'actividaes en materia de prevención. Coles mesmes, abogó pola tresmisión de conocencia dende la institución académica a los centros empresariales en beneficiu de la sociedá asturiana y de la crecedera económica de la rexón.

    La Cátedra Asturies Prevención constitúyese como llugar d'alcuentru, analís y alderique sobre les distintes temes rellacionaes cola prevención de riesgos llaborales por aciu el sofitu a la formación; la investigación, el desenvolvimientu y l'innovación (I+D+i); la divulgación y la promoción de la salú llaboral y la prevención de riesgos.

    Les actividaes y proyectos a realizar van concretar nun plan añal d'actuaciones y se estructurarán en redol a tres eje: investigación, docencia y promoción de la prevención de riesgos llaborales. El plan del presente exerciciu va cuntar con una aportación del Institutu Asturianu de Prevención de Riesgos Llaborales de 50.000 euros.

    La Cátedra va tar dirixida pol profesor del departamentu de Psicoloxía de la Universidá d'Uviéu Antonio García Esquierdu. Amás, va cuntar con una comisión de siguimientu formada por trés representantes del IAPRL y trés de la institución académica que se va encargar de supervisar y evaluar el plan d'actuaciones.

    Ente les actividaes de formación previstes figuren beques predoctorales y postdoctorales, premios al meyor espediente académicu, conferencies, etcétera. El conveniu tamién preve diverses iniciatives d'investigación, como la realización de tesis doctorales en cooperación cola empresa y la promoción d'alcuentros nacionales ya internacionales d'espertos sobre tarrezas d'interés. A lo último, el conveniu recueye acciones de tresferencia y divulgación como publicaciones sobre asuntos d'interés y la realización de xornaes de divulgación técnica y tecnolóxica.


Buscar