Noticias

  • La Universidá y el Principáu roblen un contratu programa pa impulsar la internacionalización y la tresferencia de conocencia

    11 de Abril 2011

    El rector asegura que nel ránking de prioridaes la Universidá tendría d'ocupar un puestu más avanzáu.

    Vicente Gotor y Álvarez Areces tres la firma del contratu programa
    La Universidá d'Uviéu y el Gobiernu del Principáu suscribieron un contratu programa pol que se van destinar 1,5 millones d'euros, incluyíos yá nel presupuestu universitariu de 2011, a impulsar la internacionalización de los másteres y doctoraos y la tresferencia de conocencia.

    El contratu programa inclúi partíes pa la habilitación d'instalaciones y equipamientos de la futura Escuela Internacional de Doctoráu, dientro del Centru Internacional de Posgráu; el desenvolvimientu de nueves etapes del Sistema Integráu d'Información Universitaria, equipamientos de viveros d'empresa, sofitu a la creación de Spin Offs y a la xestión de Patentes y Rexistros de la Propiedá Intelectual; la potenciación de másteres universitarios y doctoraos internacionales y la participación na Fundación del Centru d'Investigación Biomédica.

    El rector, Vicente Gotor, destacó na so intervención la llealtá cola que la institución académica trabayó col Principáu nestos trés años del so mandatu, una llealtá –dixo—que se demostró con fechos: con austeridá y unes cuentes saniaes. "Siempres miremos escontra'l futuru coles aspiraciones de les grandes universidaes; col retu de tar ente los meyores magar cuntar cola metá de recursos. Nun voi cansar de reclamar más medios, porque creo que ye xustu y que ye'l mio deber, non escontra la nuesa Universidá sinón escontra la sociedá asturiana", esplicó, al empar que reconoció que "nel ránking de prioridaes, la Universidá tendría d'ocupar un puestu más avanzáu. Vicente Gotor estimó la collaboración del Gobiernu rexonal y anunció que al Executivu que sala de les urnes tres les elecciones de mayu pidirá-y el consensu de tolos partíos políticos por que "asuman ensin reparos que la Universidá d'Uviéu ye un bien de toos y pa toos, y por eso nun puede tar sometida a vaivenes presupuestarios".

    El rector repasó'l trabayu realizáu nel últimu añu nel Campus d'Excelencia Internacional en materia de internacionalización, billingüismu, renovación de los másteres universitarios con una ufierta de programes internacionales, interuniversitarios y en collaboración cola empresa, y l'impulsu a la tresferencia de conocencia, especialmente al traviés de los clusters d'Enerxía, Medioambiente y Cambéu Climáticu y Biomedicina y Salú.

    Vicente Gotor destacó tamién el papel que va xugar el Centru Internacional de Posgráu como polu d'atracción d'alumnos estranxeros y d'otres comunidaes, y la futura Escuela Internacional de Doctoráu. "Queremos cerrar un círculu perfectu, nel que los nuesos estudiantes tengan opción de cursar un grau billingüe, siguir con un máster internacional que-yos ufierte una doble titulación con una universidá estranxera y, si deseyar, completar la so formación con un doctoráu internacional".

    Pela so parte, el presidente rexonal, Vicente Álvarez Areces, refirióse tamién a la llealtá, bona sintonía y altor de mires" que presidió les relaciones cola Universidá. Areces reconoció como lexítimes los pidimientos del rector, magar apuntó que la situación económica actual torga atender toles demandes y fai necesariu priorizar les polítiques.


Buscar