Noticias

  • La Universidá y el Conceyu d'Uviéu van desenvolver proyectos culturales y educativos conxuntos

    11 de Setiembre 2012

    El rector y l'alcalde suscriben un conveniu marco de collaboración ente dambes instituciones

    Vicente Gotor, xuntu al alcalde uvieín, esplica'l conveniu ente dambes instituciones a los medios de comunicación.

    El rector de la Universidá d'Uviéu, Vicente Gotor, y l'alcalde del Conceyu d'Uviéu, Agustín Iglesias Caunedo, suscribieron esta mañana un conveniu marco de collaboración, pol que dambes partes comprometiéronse a desenvolver proyectos conxuntos nel ámbitu de la cultura y l'educación. El rector punxo como exemplu de les iniciatives a desenvolver la realización d'una ruta clariniana virtual que va percorrer los llugares emblemáticos nos que desenvuelve la obra de Clarín na capital asturiana.

    El conveniu, que va tener una duración de tres años y un desenvolvimientu en posteriores alcuerdos específicos de collaboración, inclúi ente les prioridaes la realización d'actividaes culturales y educatives en materies como la hestoria, la lliteratura, la música, el cine, les artes plástiques y escéniques, les humanidaes, les ciencies sociales, el deporte y l'asesoramientu mutuu en dichos temes.

    Ente otres cuestiones, l'alcuerdu alude al desenvolvimientu d'investigaciones rellacionaes con cualquier aspeutu venceyáu a la planificación, caltenimientu y xestión de los recursos y actividaes municipales, según el caltenimientu, recuperación y espardimientu del patrimoniu históricu-cultural d'Uviéu.

    Tantu'l rector como l'alcalde d'Uviéu destacaron ente los futuros proyectos la posible implantación de másteres y títulos universitarios de posgrado que sían d'interés pa la ciudá, y l'estímulu a la estensión universitaria como preséu de promoción cultural pa los ciudadanos d'Uviéu.


Buscar