Noticias

  • La Universidá va tratar de captar deportistes d'élite por que se incorporen a los equipos de la institución

    13 de Ochobre 2016

    El rector, Santiago García Granda, anuncia l'apertura de les instalaciones a la sociedá y una ampliación de los horarios pa la práctica d'actividaes

    Presentación del curso deportivo de la Universidad.
    El rector de la Universidá d'Uviéu, Santiago García Granda, anunció esta mañana que la institución que dirixe va poner en marcha midíes pa captar deportistes d'élite, tamién de fora de la comunidá autónoma, coles mires de que s'integren nos distintos equipos de la Universidá. Santiago García Granda realizó estes declaraciones mientres l'actu de presentación del cursu deportivu 2016-2017.
     
    Acompañaron al rector el director d'Área de Deporte y Salú, Andrés Llavona; el director xeneral de Deportes del Gobiernu del Principáu, José Ramón Tuero; y la concejala d'Educación y Deportes del Conceyu d'Uviéu, Merced González, amás de los representantes de les entidaes patrocinadores del deporte universitario.
     
    Santiago García Granda manifestó que'l fomentu de la práctica deportiva ye una prioridá pal so equipu y avanzó que se van caltener les ayudes pa los deportistes federaos que cursen estudios na Universidá y van ameyorase les sos condiciones cola firma de nuevos convenios con clubes y asociaciones col propósitu tamién d'amontar la presencia d'Asturies nos xuegos universitarios. El rector añedió amás que,  coles mires d'abrir la Universidá a la sociedá asturiana, realizáronse esfuerzos pa l'apertura de les instalaciones universitaries los sábados y pa l'ampliación d'horarios.
     
    Andrés Llavona repitió que les instalaciones deportives de la Universidá tán abiertes a toles persones comenenciudes na práctica de dalguna actividá y anunció qu'esti cursu incorpórense trés actividaes nueves cola mirada puesta en siguir creciendo añu tres d'añu. El director d'área y el rector tuvieron palabres d'agradecimientu non solo pa los deportistes, sinón tamién pa el patrocinadores y pal personal qu'atiende les instalaciones universitaries.
     
    José Ramón Tuero indicó qu'el so departamentu trabaya p'arreglar los problemes xurídicos que dexen a los universitarios y al personal de la institución aportar a les instalaciones deportives del Principáu. Merced González, a lo último, manifestóse partidaria de fomentar el conveniu esistente ente la Universidá y el Conceyu d'Uviéu y d'estrechar les relaciones p'acometer midíes de discriminación positiva en favor de los equipos femeninos de la Universidá.
     
    Mientres el pasáu añu, casi 116.000 usuarios esfrutaron de les instalaciones deportives de la Universidá, lo que supon una medría del 43% con respectu al cursu 2012-2013. 
     

Buscar