Noticias

  • La Universidá axunta a la Comisión de Siguimientu del Campus d'Excelencia Internacional

    17 de Febreru 2014

    La institución académica informó del progresu del CEI nos últimos cuatro años al órganu integráu por instituciones públiques y axentes económicos y sociales que formen parte del agregamientu estratéxicu

    Los miembros de la comisión se siguimientu al empiezu de la xunta celebrada na Biblioteca del Edificiu Históricu.

    La Universidá d'Uviéu axuntó a la Comisión de Siguimientu del Campus d'Excelencia Internacional pa informar del desenvolvimientu del proyectu Ad Futurum nos últimos cuatro años, dende la concesión del sellu en noviembre de 2009. El rector, Vicente Gotor, y el presidente del Principáu, Javier Fernández, han copresidido la xunta con alcaldes y representantes de conceyos, y axentes económicos y sociales de la rexón. Dambos coincidieron na importancia de caltener esta acreditación internacional nel procesu definitivu d'evaluación que la comisión internacional d'espertos va celebrar en  2014.

    La vicerrectora d'Investigación y Campus d'Excelencia Internacional, Paz Suárez Rendueles, presentó l'informe d'actuaciones del CEI Asturies-Ad Futurum (2009-2014), nel que destaca'l progresu nes árees de docencia y internacionalización, y la relación col sector empresarial y cola redolada territorial. Suárez Rendueles punxo de relieve los principales llogros que fueron posibles gracies al sellu d'excelencia.

    Ente otres cuestiones, l'informe incide nel plan de billingüismu, cola implantación de 14 graos billingües; el llogru de másteres Erasmus Mundus, trés d'ellos coordinaos pola Universidá d'Uviéu; les dobles titulaciones dientro de la institución académica y en collaboración con universidaes estranxeres; la meyora nos principales indicadores d'investigación, especialmente nes árees d'especialización del CEI: Enerxía, Medioambiente y Cambéu Climáticu, y Biomedicina y Salú; l'aumentu de proyectos d'investigación en convocatories competitives de la mano de la empresa; y les acciones de collaboración col sector granible y con instituciones de la rexón.

    El rector, Vicente Gotor, recordó qu'a finales de 2014 va sabese si la Universidá caltien el sellu d'excelencia. "Ye esencial que trabayemos estos seis meses pa permanecer col sellu", indicó. Vicente Gotor avanzó tamién que nos próximos meses van roblase distintes cátedres con empreses asturianes, pa potenciar les relaciones cola industria rexonal. Pela so parte, el presidente del Gobiernu asturianu, Javier Fernández, sorrayó'l papel que tán xugando los cluster del CEI y precisó que  "nuna situación tan complexa y de dificultá hai que felicitar a la Universidá pol caltenimientu del sellu y pol trabayu que ta faciendo".

    El programa de Campus d'Excelencia Internacional forma parte de la Estratexa 2015 del Gobiernu d'España y, anque dexara de cuntar con financiamientu propiu, caltien vixente'l siguimientu de los oxetivos trazaos nes convocatories anteriores. La Universidá d'Uviéu foi una de los nueve primeres en llograr el sellu d'excelencia col proyectu Ad Futurum, en 2009.


Buscar