Noticias

  • La Universidá rescata dibuxos inéditos de Vaquero Palacios y un mural de Paulino Vicente nel so plan de restauración patrimonial

    08 de Xineru 2015

    Los trabayos de caltenimientu del patrimoniu históricu inclúin la restauración d'obra mural de Rubio Camín, un tramu d'una vidrera d'Antonio Suárez y antigües orles de la Facultá de Derechu.

    Bocetu recuperáu de la Basílica de La nuesa Señora de Cuadonga, dibuxu inéditu de Joaquín Vaqueru Palacios.

    La Universidá d'Uviéu dio un nuevu impulsu a la recuperación del so patrimoniu históricu artísticu que dexó, ente otres actuaciones, rescatar siete dibuxos hasta agora desconocíos atribuyíos a Joaquín Vaquero Palacios, restaurar un mural de Paulino Vicente y recuperar parte d'una vidrera d'Antonio Suárez. Amás, los trabayos incidieron na restauración d'obra mural de Rubio Camín, dos vidreres y delles orles antigües que figuren nel inventariu de la institución académica asturiana.

    Les obres de reforma integral del Colexu Mayor América facilitaron una refecha catalogación, que dio como resultáu l'afayu de dibuxos inéditos atribuyíos a Joaquín Vaquero Palacios, responsable del diseñu arquitectónicu del edificiu, qu'amuesen vistes panorámiques de ciudaes y redolaes naturales. Ente les pieces, atópense dos bocetos que representen la Basílica de La nuesa Señora de Cuadonga y el conventu de San Salvador de Valdediós. El delicáu estáu de caltenimientu en que s'atopaben los dibuxos obligó a realizar un minuciosu procesu de recuperación lleváu a cabu pola especialista María Blanco de la Piñera.

    Otra de les acciones singulares del plan de caltenimientu del patrimoniu universitariu, impulsáu dende'l Vicerrectoráu de Campus, Informática ya Infraestructures y supervisáu dende'l serviciu de Bienes Culturales, Esposiciones y Protocolu, centróse na restauración d'un mural allugáu nel Colexu Mayor San Gregorio. El llabor de llimpieza y caltenimientu de la obra, llevada a cabu pol restaurador Luis Suárez Saro, dexó faer visible la firma de Paulino Vicente. El mural, de temática universitaria, representa a un grupu d'escolinos vistíos colos tradicionales vezos negros y beques pardes característicos del antiguu colexu de San Gregorio fundáu por Fernando de Valdés pal estudiu del llatín. El pintor asturianu inclúi na so obra un llibru abiertu como recursu pa roblar, fechar la obra y asitiala nel contestu universitariu de los años 50, mentando espresamente a Valentín Silva Melero qu'ocupaba'l cargu de Rector, y a Torcuato Fernández Miranda, entós director xeneral d'Enseñanza Universitaria.

    Nes actuaciones de restauración de vidreres, recuperáronse fragmentos d'una obra d'Antonio Suárez, desmontada va décades nuna de les reformes realizaes na actual Facultá de Xeoloxía. Los técnicos consiguieron reconstruyir un fragmentu de la vidrera orixinal que s'asitió sobre un panal de fierro nel antepar principal. Dientro del edificiu diseñáu por Ignacio Álvarez Castelao, tamién se dio en la reintegración controlada y llimpieza de los cinco murales de Joaquín Rubio Camín qu'aluden a les distintes disciplines de les facultaes de Xeoloxía y Bioloxía. L'artista diseñó les cinco pieces en 1967 y executáronse una década más tarde incluyendo elementos rellacionaos coles árees d'estudiu como fósiles, piedres y cristales. Los trabayos de recuperación de los cinco murales fueron desenvueltos por Luis Muñiz.

    Les actuaciones de recuperación y caltenimientu de patrimoniu inclúin, amás, la restauración de delles orles antigües de la Facultá de Derechu que se ta llevando a cabu na actualidá na Escuela Cimera d'Arte d'Asturies. La colección de semeyes esibe delles promociones de finales de sieglu XIX y dalgunes de mediaos del sieglu XX. Les estampes más antigües dexen ver ente'l cuadru de profesores de la facultá a personaxes tan destacaos como Leopoldo Alas, Fermín Canella o Melquiades Álvarez.

    El prestixosu vitralista Santos Cuadrado ye l'autor d'otra de les obres restauraes a lo llargo del pasáu añu. Tratase d'una vidrera originalmente asitiada na capiya del antiguu colexu mayor Valdés Salas que representa una redolada natural con elementos de clara connotación relixosa. La obra restaurada quedó instalada nel antepar de l'actual Escuela Cimera d'Inxeniería Informática d'Uviéu.

    Per otru llau, la Universidá habilitó un espaciu específicu como depósitu d'obres pa caltener en condiciones óptimes les pieces del so inventariu patrimonial que nun s'atopen espuestes en nenguna de les sos dependencies. Finalmente, tamién se dio en anovar toa'l llume xeneral y de vitrines nel Muséu de la Facultá de Xeoloxía.

    La puesta en valor del patrimoniu histórico y artístico de la institución académica ye unu de los oxetivos recoyíu dientro del proyectu Ad Futurum desenvueltu pol Campus d'Excelencia Internacional. A les llabores de restauración y caltenimientu del patrimoniu sumáronse nos últimos años iniciatives pioneres como GAUDEO (Galería de la Universidá d'Uviéu) que dexa l'accesu a una visita virtual pormenorizada por toles dependencies del Edificiu Históricu de la Universidá y cuenta con una galería d'arte onde puede reparase el ricu patrimoniu históricu artísticu con una detallada descripción técnica de cada pieza.

    Imaxes:


Buscar