Noticias

  • La Universidá refuerza la so estratexa de internacionalización con práctiques de cooperación

    28 de Abril 2015

    Estudiantes de grau y máster universitariu trabayen en proyectos humanitarios de Cáritas n'Iberoamérica y África pa completar la so formación académica

    Comunidá llabradora del baxu Atrato, en Colombia, unu de los llugares nos que se desenvuelven proyectos de cooperación internacional. Semeya: Álvaro Villegas.

    La Universidá d'Uviéu realizó nos últimos años un apueste estratéxicu pola internacionalización, non solo na docencia o na investigación, sinón la movilidá d'estudiantes de grau y máster universitariu pa complementar la so formación fora de les nueses fronteres. Les práctiques en proyectos internacionales de cooperación al desenvolvimientu son una de les alternatives por que los alumnos tomen contactu con otres realidaes social y cultural y puedan adquirir esperiencia sobre'l terrén con un componente solidariu y de compromisu.

    La institución académica asturiana, en collaboración con Cáritas Asturies y l'Axencia Asturiana de Cooperación, impulsa cada añu ayudes por qu'universitarios de distintes cañes de conocencia collaboren en proyectos de la organización n'Iberoamérica y África. Les beques, xestionaes pol vicerrectorado de Internacionalización y Posgráu, reciben alredor de mediu centenar de solicitúes cada añu y los sos beneficiarios llogren una intensa formación previa antes de pasar ente 4 y 6 selmanes nel país de destín. Una esperiencia que, según los sos propios protagonistes, camuda la visión personal y profesional.

    Esti tipu d'iniciatives enmárquense dientro de los oxetivos del Campus d'Excelencia Internacional pa estrechar el compromisu cola sociedá. Dellos participantes nel programa comparten la so vivencia con otros estudiantes comenenciudos nel mundu de la cooperación al traviés de charres que refundien una conclusión unánime: el deséu de volver.

    "Yo en realidá fui a Perú a desaprender", intenta esplicar Eric Cuesta a otros alumnos comenenciudos en solicitar les ayudes. Ta terminando los sos estudios d'Enfermería y pasó delles selmanes na sierra peruana desenvolviendo talleres d'Educación pa la Salú. "Realmente te das cuenta de la diferencia de valores y prioridaes y que tou lo que nós tendríamos qu'aprender", rellata a los asistentes a la sesión informativa na Facultá de Formación de Profesoráu y Educación.

    Álvaro Villegas aprendió'l pasáu branu a llevantar valles nuna rexón montascosa al noroeste de Medellín, en Colombia. Esti estudiante de Psicoloxía trabayó al pie de colectivos que los sos derechos humanos fueron violaos y que, en munchos casos, fueren movíos de les sos tierres. "En realidá te das cuentes de que yes una especie de muriu de contención por que puedan restituyise les redes comuñales llabradores", cuenta a otros estudiantes mientres ilustra la so charra con semeyes de les comunidaes nes qu'aprendió "un montón" y a les que quier tornar esti branu.

    El respetu a les formes distintes de ver una mesma realidá ye una llección pervalible que Cayetana Arias traer de Perú. "Dacuando nun ye tan fácil como aplicar les nueses soluciones evidentes y práctiques porque ellos tienen la so propia manera d'entender la vida y la to actuación como profesional hai de contemplar eso", remarca esta estudiante d'Enfermería que trabayó coles comunidaes de Cajamarca en Perú. Tapar la fruta, zarrar a los animales nuna cortil específica que nun sía la cocina o refugar la carne d'animales enfermos son dalgunos de los conseyos que Cayetana aprendió a dar nel so proyectu de Families y Viviendes Saludables.

    Un hospital nel centru de Yaundé, la capital de Camerún, foi l'escenariu de les práctiques de Loreto Arias. Ellí pasó por tolos servicios y comprobó que la solidaridá favorez los meyores resultaos. "Falta de too", resume, y munches vegaes son los mesmos facultativos quien traten de desaniciar eses faltes. "Vi a médicos pagar material o operaciones del so propiu bolsu por que un neñu nun morriera", esplica. "Eso te camuda l'enfoque y cuando vuelves sabes que la to manera d'actuar nel día ente día nun puede siguir siendo igual", apunta en referencia, por casu, a la xestión eficiente de recursos.

    La convocatoria de beques en proyectos de cooperación al desenvolvimientu pa estudiantes de la Universidá d'Uviéu ta abierta hasta'l próximu 5 de mayu. Pueden aspirar a elles alumnos de grau y máster universitariu que cumplan los requisitos axustaos. Cáritas Asturies va impartir formación previa a los aspirantes y va faer la selección de candidatos definitivos y de destinos. Les práctiques en cooperación internacional van poder convalidase por creitu en función de la especialidá y el destín.

    Imaxe banner de portada

    Neños nuna de les aldegues de la rexón de Cajamarca, na sierra peruana. Semeya: Cayetana Arias.

    Imaxes:


Buscar