Noticias

  • La Universidá promueve una técnica innovadora pa tratar l'autismu

    09 de Marzu 2011

    La institución académica figura ente les 20 primeres del mundu n'investigación sobre terapies efectives pa esta enfermedá

    Presentación de la Caxa ABA na Universidá

    La Universidá d'Uviéu acaba de presentar una ferramienta innovadora sobre la metodoloxía del Analís de la Conducta como tratamientu del autismu. La ‘Caxa ABA' ye la resultancia del proyectu científicu internacional STAMPPP y tien como oxetivu dar a conocer a padres y educadores de neños autistes una terapia que, según los espertos, ye efectiva p'ameyorar l'aprendizaxe y la calidá de vida de los afectaos. La caxa contien un manual sobre esti métodu, un DVD con vídeos de profesionales y de padres, un CD-ROM con recursos variaos, un cuadiernu pa rexistrar conductes, un bolígrafu y una mascota del proyectu.

    El grupu investigador de la Universidá d'Uviéu, dirixíu por Luis Antonio Pérez González, ye l'únicu n'España qu'investiga cola metodoloxía ABA y que participa nel Proyectu STAMPP (Science and the Treatment of Autism: A Multimedia Package for Parents and Professionals), un programa Leonardo da Vinci d'espardimientu de la innovación de la Unión Europea que foi dirixíu pol Dr. Mickey Keenan, de la Universidá del Ulster, y nel que participaron investigadores del Reinu Uníu, Alemaña y Noruega.


    Na presentación participaron el vicerrector d'Investigación, Santiago García Granda; la vicerrectora de Internacionalización y Cooperación al Desarrollu, Ana María Fernández; el director Xeneral de Mayores y Discapacidá, Alejandro Suárez, y el coordinador del equipu d'investigación universitaria, Luis Antonio Pérez.


    Ana María Fernández punxo esti novedosu material --que se va distribuyir n'España, Reinu Uníu, Alemaña y Noruega—como exemplu del espardimientu de la innovación y tamién de la importancia de programes como'l Leonardo da Vinci, que fixo posible que se lleve a cabu esti proyectu.


    El vicerrector d'Investigación destacó la calidá del trabayu del equipu del departamentu de Psicoloxía, que recibió tres premios internacionales de l'Asociación Internacional d'Analís de la Conducta (ABAI) y convirtióse nuna referencia a nivel européu ya internacional. Ello ye que un recién informe sobre la efectividá de los tratamientos ABA p'autismu n'Estaos Xuníos (National Standards Report) cita cinco artículo científicos d'esti grupu d'investigación. Un datu qu'asitia a la Universidá d'Uviéu ente les venti primeres universidaes del mundu n'investigación sobre tratamientos efectivos pal autismu. L'equipu trabaya con Douglas Greer, del Teachers College de la Universidá de Columbia, posiblemente l'investigador más relevante nesti ámbitu. Santiago García Granda incidió tamién en qu'esti proyectu comparte los oxetivos del Campus d'Excelencia Internacional, al traviés del Cluster de Biomedicina y Salú.


    Pérez González esplicó'l conteníu de la Caxa ABA y esplicó qu'esta terapia pal autismu basada na metodoloxía d'Analís de la Conducta demostró la so efectividá al llograr que los neños puedan controlar esfínteres, comer solos y aprender el llinguaxe vocal. Anguaño hai cerca de 150 neños diagnosticaos con autismu n'Asturies, magar esta metodoloxía nun s'aplica nos centros públicos y ye bien puntual nos privaos. L'investigador indicó que'l problema ye la falta de profesionales formaos nesti métodu. Pela so parte, el director xeneral de Mayores y Discapacidá precisó que se va analizar la posibilidá d'introducir esti tipu de tratamientos en centros públicos.


    La Universidá d'Uviéu dispon de mil caxes ABA que se van destinar a agrupaciones profesionales, a colexos y a asociaciones de padres de toa España. Pa ello, van entamase seminarios dedicaos a esplicar los principios d'esta metodoloxía y l'usu fayadizu de les caxes.


Buscar