Noticias

  • La Universidá presenta una plataforma dixital con más de cien obres d'arte y les sos xoyes bibliográfiques

    04 de Febreru 2013

    La institución académica remata GAUDEO, un innovador proyectu pa la divulgación del patrimoniu

    Imaxe de la presentación de GAUDEO

    Más d'un centenar d'obres d'arte y dalgunes de les principales xoyes bibliográfiques, munches d'elles pieces úniques, formen parte de GAUDEO, un innovador proyectu de divulgación del patrimoniu qu'acaba de rematar la Universidá d'Uviéu. Dempués de la presentación de la primer fase, va un añu, la Galería de la Universidá d'Uviéu se completó y ameyoró tantu en conteníos como en diseñu, cola incorporación como novedá d'una cuidada biblioteca dixital que pon a disposición de la sociedá exemplares únicos y inaccesibles pal públicu.

    GAUDEO ufierta la posibilidá de realizar una visita virtual pol Edificiu Históricu de la Universidá d'Uviéu, producida con fotografía esférica; aportar a una galería on line con imaxes n'alta definición de cada obra d'arte y otros oxetos significativos, acompañaos d'una completa ficha; y consultar una biblioteca dixital con xoyes bibliográfiques y llibros especiales de la Biblioteca Histórica de la Universidá d'Uviéu.

    La tecnoloxía utilizada sigue'l modelu del Muséu del Prau na so galería on line o de la Biblioteca Nacional de Francia -Gallica- na so biblioteca dixital, ente que la visita virtual ta oldeada a la National Gallery de London. GAUDEO asitia a la Universidá d'Uviéu a la cabeza de les universidaes españoles en proyectos d'espardimientu del patrimoniu.

    Al traviés d'esta galería, los espertos pueden conocer tolos detalles de pieces úniques, como trés talles y parte del retablu fundacional de la institución académica, de 1607, salvaes del fueu que destruyó la Universidá na Revolución d'Ochobre de 1934, o'l llibru El Baladro del Sabiu Merlín coles sos profecíes, un incunable d'estraordinaria rareza y gran guapura formal, únicu exemplar conocíu de la edición burgalesa de 1498.

    Obres úniques y inaccesibles al públicu

    La biblioteca dixital esibe tamién obres que nun pueden atopase n'otru llugar y inaccesibles pal públicu como Arte de ferrar cavallos, en dialogo, el primera Plan d'estudios de la Real Universidá d'Uviéu, Statutos de la Universidá d'Uviéu (los primeros estatutos de la institución académica) y Llibre de menescalia (en castellán:) Llibru de albeyteria.

    Tamién s'inclúin obres de Feijoo o Xovellanos y van dise incorporando nuevos volumes como una primer edición de Rexentar, ediciones d'El Quixote, amás d'otros incunables y manuscritos.

    Pintures y obra gráfica d'autores asturianos

    Polo que respecta al restu d'obres d'arte, muebles y otros oxetos, GAUDEO dexa un estudiu detalláu, tantu pola ficha técnica como pola calidá de la imaxe, de 77 pintures y obres gráfiques, 14 pieces de moblame y nueve vidreres. Ente el autores de les pintures figuren nome como Nicanor Piñole, Dionisio Fierros, Joaquín Rubio Camín, Joaquín Vaqueru Palacios, Paulino Vicente ‘El Mozu', Alejandro Mieres, Eduardo Úrculo, Álvaro Delgado, Bernardo Sanjurjo, Orlando Pelayo, Ruperto Álvarez Caravia, César Pola, Joaquín Vaqueru Turcios, Pelayo Ortega, Ricardo Mojardín, Manuel García Llinares, Carlos Sierra, ente otros.

    Esti proyectu, de calter multidisciplinar y nel que trabayaron numberosos espertos de la Universidá d'Uviéu nos últimos dos años, constitúi un exemplu de tresferencia de conocencia escontra la sociedá y de divulgación del patrimoniu, que, amás, cuenta con versión billingüe (español-inglés) lo que va facilitar el so espardimientu internacional.

    Imaxes:

    Enllaces Rellacionaos:


Buscar