Noticias

  • La Universidá presenta 249 cursos pa la temporada deportiva 2011-2012

    31 de Ochobre 2011

    Quier potenciase el deporte como forma de salú, más allá de la so aguada competitiva.

    Rueda de prensa de la presentación.

    La Universidá d'Uviéu programó un total de 249 cursos en 45 disciplines arrexuntaes n'actividaes d'acondicionamientu físicu, actividaes de la naturaleza, aprendizaxe deportivu, espresión corporal y deporte salú. Dende cursos de aerobic, yoga o ximnasia de caltenimientu, hasta surf, kayak de mar, o pádel, pasando por salíes de monte, descensu de cañones o espeleoloxía.

    Toa esa nutrida ufierta integra'l Cursu Deportivu 2011-2012, presentáu'l pasáu día 28 d'ochobre pol rector, el vicerrector d'Estensión Universitaria, Cultura y Deportes y el director de la Área de Deporte y Salú de la Universidá d'Uviéu, acompañaos del director xeneral de Deportes del Principáu, Marcos Niño.

    Miguel del Valle, director de la Área de Deportes de la Universidá, destacó amás l'apertura d'instalaciones deportives en Mieres como una de les principales novedaes del cursu. Unes infraestructures con gran aceptación y arribación d'universitarios. Coles mesmes, Del Valle confía en que les obres de les instalaciones d'Uviéu tean llistes por que los usuarios puedan volver utilizales antes del periodu navidiegu.

    Amás, tantu'l vicerrector d'Estensión Universitaria, Vicente Domínguez, como'l director xeneral de Deportes del Principáu, Marcos Niño, amosaron el so interés en potenciar el deporte como forma de salú, más allá de l'aguada competitiva.

    Enllaces Rellacionaos:


Buscar