Noticias

  • La Universidá ufierta un títulu propiu d'espertu en pilotaje remotu de drones y aeronaves de nala fixa

    02 de Xunu 2016

    Busca de xacimientos arqueolóxicos, control de contaminación atmosférica, agricultura de precisión y supervisión de cultivos, detección precoz de quemes y rescate de persones figuren ente les aplicaciones práctiques de les naves ensin tripular que van remanar los estudiantes

    Un dron, en pleno vuelo.
    La Universidá d'Uviéu va poner en marcha'l próximu cursu un títulu propiu d'espertu n'aeronaves pilotaes remotamente y autónomes pioneru nel ámbitu universitariu. A diferencia d'otros estudios similares, esti cursu de posgráu non solo ufierta la llicencia de pilotu de dron civil, sinón tamién el certificáu pal manexu de drones multi-rotor y de nala fixa, según formación sobre les aplicaciones tecnolóxiques ya industriales, diseñu, axustes y aspeutos llegales y alministrativos y práctiques de vuelu real. 
     
    Los estudios, que se van impartir nos campus de Xixón y Mieres, van encetar distintos ámbitos nos que s'utilicen esti tipu aeronaves, munchos d'ellos rellacionaos con proyectos nos que trabayen investigadores de la Universidá d'Uviéu. Destaquen ente les aplicaciones, la detección de xacimientos arqueolóxicos, control de la contaminación atmosférica, agricultura de precisión y control de cultivos, protección civil y rescate de persones, y detección precoz de quemes.
     
    El cursu, coordináu pol profesor Manés Fernández, ta impulsáu por profesores d'Inxeniería Eléctrica, Topografía, Teoría de la Señal y Derechu Públicu, amás de personal técnico, y cuenta cola participación de la empresa Asturavia, acreditada pola Axencia Estatal de Seguridá Aérea pa impartir cursos de pilotaje. Amás del llaboratoriu de RPAs (Remotely Piloted Aircrafts)  de la Universidá d'Uviéu, tamién se va habilitar una sala de simulación de vuelu y disponse d'una parcela homologada pola Federación Aeronáutica del Principáu nel campus de Xixón pa les práctiques de vuelu.
     
    Los estudiantes tienen de tar en posesión d'una titulación universitaria en cualquier caña de conocencia, cuidao que el cursu cubre toles aplicaciones de los RPAs en tolos sectores empresariales, tantu d'Inxeniería y Arquitectura como Ciencies y Artes y Humanidaes. El periodu de preinscripción ye del 1 al 15 de xunu, y cuenta con 20 places. El cursu tien duración d'un trimestre na modalidá semipresencial: formación teóricu/práctica al traviés del campus virtual de la Universidá d'Uviéu y trabayu autónomu, talleres prácticos presenciales de toles materies y clases práctiques de vuelu con múltiples plataformes.

    Imaxes:

    Vídeos Rellacionaos:

    Enllaces Rellacionaos:


Buscar