Noticias

  • La Universidá edita un manual pa facilitar la xestión de trámites a los estudiantes

    24 de Febreru 2012

    La guía esclaria los requisitos y llugares ónde xestionar cuestiones rellacionaes con matrícules, preinscripciones, certificaos o convalidaciones

    Alumnos utilizando un Terminal Puntu Serviciu (TPS) de la Universidá.

    El Vicerrectorado d'Estudiantes y Empléu ellaboró una senciella guía por que los alumnos puedan saber de forma rápida cómo se realicen ciertos trámites, qué requisitos hai que completar pa cada unu y a ónde hai que dirixise pa poder xestionalo. La iniciativa pretende simplificar y allanar el camín de los trámites burocráticos a los alumnos y llograr asina una mayor eficiencia na xestión.

    El manual ta disponible na páxina web de la Universidá y puede atopase na Secretaría virtual habilitada pa los Estudiantes sol títulu Te ayudamos colos trámites. El manual esplica refechamente un total de 36 xestiones específiques referentes a certificaciones y títulos, convocatories, evaluación, incidencies y situaciones escepcionales, matriculación y preinscripciones o la reconocencia de creitos y convalidaciones.

    La guía esplica pa qué sirve específicamente esa xestión, qué requisitos documentales faen falta pa completala, qué organismu ye'l responsable y ónde tán les sos oficines y, finalmente, la posibilidá de descargase los formularios ya instancies online. Tamién se recueyen toles referencies a la normativa vixente nesi campu y les posibilidaes que puedan esistir de presentar recursos.

    El manual conviértese asina nun recursu pervalible pa los estudiantes a la d'empecipiar cualquier procesu burocráticu na Universidá, que va contribuyir a entainar los tiempos de xestión y ameyorar la eficiencia.

    Enllaces Rellacionaos:


Buscar