Noticias

  • La Universidá d'Uviéu y Liberbank refuercen la so collaboración con programes de sofitu a la excelencia docente ya investigadora

    18 de Avientu 2014

    El conveniu suscritu esta mañana potencia'l billingüismu y la retención de nuevos talentos, ya inclúi beques de movilidá pa estudiantes, premios a los meyores espedientes y ayudes a investigadores estranxeros

    El director territorial d'Asturies Empreses de Liberbank y el rector, tres la firma del conveniu

    La Universidá d'Uviéu y l'entidá financiera Liberbank suscribieron un conveniu de collaboración institucional pal impulsu de la docencia y l'investigación nel marcu del Campus d'Excelencia Internacional. El rector de la Universidá, Vicente Gotor, y el director territorial d'Asturies Empreses de Liberbank, Juan Ignacio Muñiz Rodríguez, suscribieron esta mañana l'alcuerdu marco, pol que la entidá bancaria va apurrir 843.000 euros hasta 2016.

    Les acciones que se van desenvolver tienen como oxetivu impulsar la docencia d'excelencia y aguiyar la retención de talentu con premios y beques pa los estudiantes con meyores espedientes. El sofitu que la entidá financiera vien emprestando a la docencia billingüe en 16 titulaciones de la Universidá d'Uviéu vese reforzáu con esti nuevu alcuerdu de collaboración, qu'inclúi la puesta en marcha del Programa Liberbank de Billingüismu de la Universidá d'Uviéu. Esta iniciativa va sofitar los cursos de acreditación de competencies llingüístiques del profesoráu, los cursos cero pa estudiantes de nuevu ingresu qu'opten por un itinerariu billingüe, y l'ufierta formativa d'inglés pal profesoráu, personal d'alministración y servicios, y estudiantes universitarios.

    Tamién se van convocar les Beques Liberbank de retención de nuevos talentos pa cursar Másteres Universitarios na Universidá d'Uviéu. D'estes ayudes van poder beneficiase alumnos que tengan un espediente académicu sobresaliente y qu'adquieren el compromisu de realizar la so tesis doctoral na Universidá d'Uviéu, evitando d'esta manera la fuga de celebros. L'importe de cada beca va ser de 10.000 euros.

    Otra de les llínees de collaboración apuesta por fomentar la movilidá d'estudiantes por aciu ayudes Liberbank nel marcu del programa nacional SICUE, que facilita la estancia d'estudiantes de grau de la Universidá d'Uviéu n'otra ciudá española.

    Amás, el conveniu inclúi los premios Liberbank d'investigación de Medicina del Deporte, al meyor espediente de la Universidá d'Uviéu y los premios fin de carrera a los meyores espedientes del Grau n'Alministración y Dirección d'Empreses, y el Grau n'Economía. Polo que respecta a la internacionalización de la investigación, el conveniu va incluyir ayudes destinaes a investigadores estranxeros pa fomentar la collaboración cola Universidá d'Uviéu.


Buscar