Noticias

  • La Universidá d'Uviéu y l'empresa Hunosa amplíen la so collaboración en materia d'investigación

    17 de Avientu 2014

    La institución y la compañía van desenvolver proyectos rellacionaos cola geotermia y la biomasa, y van impulsar premios y beques pa estudiantes

    El rector y la presidenta d'Hunosa, tres la firma del conveniu

    La Universidá d'Uviéu suscribió güei un conveniu cola empresa Hunosa p'ampliar la collaboración en distintos ámbitos. El rector, Vicente Gotor, y la presidenta de la compañía estatal, María Teresa Mallada, suscribieron l'alcuerdu marco, que se va desenvolver n'otros trés convenios específicos centraos na investigación, la Cátedra Hunosa y l'Escuela d'Inxeniería de Mines, Enerxía y Materiales d'Uviéu.

    El rector destacó esti alcuerdu como un importante pasu p'averar la Universidá a la empresa y potenciar la investigación, especialmente la rellacionada cola geotermia y la biomasa. La presidenta d'Hunosa esplicó que la collaboración n'I+D+i va emprestar especial atención a proyectos sobre eficiencia enerxética, biomasa, regasificación y aprovechamientu de l'agua que se bombia de les mines pa la climatización d'edificios y de la biomasa forestal de la compañía como combustible. Coles mesmes, va potenciase l'Aula de Geotermia del campus de Mieres.

    Polo que respecta a la Cátedra Hunosa, va roblase tamién un conveniu específicu pa retomar les actividaes de xornaes, ente que la tercer llínea de collaboración va centrar nel financiamientu de premios de tesis doctorales y premio fin de carrera pa estudiantes. A la firma del conveniu tamién asistieron la vicerrectora d'Investigación y Campus d'Excelencia Internacional, Paz Suárez Rendueles, y el secretariu xeneral d'Hunosa, Juan José Fernández.


Buscar