Noticias

  • La Universidá d'Uviéu y l'empresa ALSA abren una nueva llínea de collaboración

    25 de Abril 2012

    Dambes instituciones roblaron un conveniu marco que va impulsar la creación de beques p'alumnos estranxeros d'excelencia y el sofitu a la formación de posgráu

    D'esquierda a derecha, Jacobo Cosmen, José Cosmen Adelaida, Manuel Parrondo, Vicente Gotor y Santiago Álvarez.

    La Universidá d'Uviéu y l'empresa ALSA abrieron una nueva llínea de collaboración cola firma d'un conveniu marco dientro del que se van definir acciones específiques rellacionaes col fomentu de la investigación n'actividaes rellacionaes cola empresa, el sofitu al desenvolvimientu de programes universitarios de posgraos y la concesión de beques pa la incorporación d'alumnos estranxeros a la Universidá d'Uviéu.

    Al actu de la firma del conveniu allegaron el rector de la Universidá d'Uviéu, Vicente Gotor, el presidente de ALSA Asturies, Jacobo Cosmen, el director de la División territorial de ALSA, Manuel Parrondo, el vicerrector de Planificación Económica, Convenios y Contratos, Santiago Álvarez, y el presidente d'honor del grupu ALSA, José Cosmen Adelaida.

    El rector de la Universidá d'Uviéu, Vicente Gotor, amosóse por demás satisfechu por poder afondar na filosofía de collaboración cola empresa. "Dende'l nuesu Campus d'Excelencia procuremos fomentar l'enfotu nesa necesaria conexón ente empresa y Universidá y con esti conveniu siguimos trabayando nesa llínea", esplicó'l rector, quien estimó especialmente a la familia Cosmen el so interés pola Universidá.

    Pela so parte, el presidente de Alsa Asturies Jacobo Cosmen destacó la importancia d'esti tipu de collaboraciones "nunos momentos de crisis como los que vivimos porque precisamos siguir aprendiendo. ALSA y l'Universidá d'Uviéu tienen munchos puntos coincidentes y la nuesa intención ye dir afayando xuntos toles posibilidaes de collaboración y dir aprobándoles y poniéndoles en práctica".

    La implantación internacional de ALSA, especialmente en territorios como China, pue ser unu de los activos que dexe llograr una mayor proyección esterior de la Universidá d'Uviéu. Vicente Gotor aprovechó la ocasión pa repitir la necesidá d'aprobar una Llei de Mecenalgu que "ayude a fomentar la collaboración ente empresa y Universidá y que garantice una torna y un beneficiu mutuu". Nel mesmu sentíu pronuncióse Jacobo Cosmen, quien s'amosó convencíu que nun futuru próximu "fórmules d'eficiencia y collaboración como esta van ser muncho más frecuentes" y señaló qu'una normativa d'estes característiques supondría "una bona ferramienta".


Buscar