Noticias

  • La Universidá d'Uviéu métese na plataforma d'espardimientu de conteníos dixitales Europeana

    09 de Mayu 2011

    La institución académica dispon de cerca d'un millar de vídeos nel repositorio on-line impulsáu pola Unión Europea.

    La Universidá d'Uviéu yá forma parte de Europeana, l'organismu creáu pola Unión Europea pal espardimientu de conteníos dixitales de calter cultural n'Internet, tres la firma d'un conveniu de collaboración que convierte a la institución asturiana en miembru agregador de dichu proxecto. D'esta miente, la Universidá non yá tien la posibilidá d'apurrir los sos propios conteníos dixitales a la plataforma europea, sinón qu'amás foi escoyida pa coordinar una futura rede d'instituciones collaboradores.

    La institución académica asturiana tien yá nel repositorio on-line de la plataforma europea cerca d'un millar de vídeos sobre actividaes culturales, académiques y científiques, y ye una de les poques universidaes españoles que formen parte d'esti organismu. El conveniu ente la Universidá d'Uviéu y Europeana enmárcase dientro del apueste del Campus d'Excelencia Internacional por potenciar l'espardimientu de l'actividá investigadora que se lleva a cabu n'Asturies y del patrimoniu de la institución académica.

    Europeana, que tien la so see na Biblioteca Nacional de los Países Baxos, nació nel añu 2008 "coles mires de faer accesible al públicu'l patrimoniu cultural y científicu européu". Al traviés de la so páxina web, www.europeana.eu, pueden esquizase les colecciones dixitales de museos, biblioteques, arquivos y arquivos audiovisuales d'Europa. Los sos más de 15 millones de conteníos inclúin, por casu, cuadros, llibros, fotografíes y material audiovisual (películes, documentales, reportaxes…).

    La Mediateca del Centru d'Innovación, que forma parte del Vicerrectorado d'Informática y Comunicaciones de la Universidá d'Uviéu, ye'l grupu de trabayu al traviés del cual establecióse la collaboración con Europeana. La Mediateca –tamién conocida como Encycloasturias– trabaya dende 2001 na ellaboración y espardimientu de conteníos dixitales rellacionaos cola cultura y el patrimoniu d'Asturies. Hasta la fecha cunta con alredor de 3.000 conteníos, nel so mayor parte audiovisuales (conferencies impartíes na mesma Universidá d'Uviéu, reportaxes sobre ciencia, cultura y patrimoniu d'Asturies, etcétera), a los cualos puede aportase al traviés de la so páxina web, http://www.encycloasturias.com.

    Dos de los proyectos de Encycloasturias –conocíos como Centru de Conocimiento "Principáu d'Asturies" y Muséu Virtual d'Asturies (MUVAS)– cuntaron con financiamientu del Ministeriu d'Industria, Turismu y Comerciu, al traviés del Plan Avanza. El primeru d'ellos ye una rede d'instituciones impulsada pola mesma Universidá y que'l so oxetivu ye caltener y espublizar la cultura y l'actividá investigadora desenvueltes nel ámbitu asturianu. Al pie de la mesma Universidá, integren dicha rede'l Conservatorio Cimeru de Música del Principáu d'Asturies; dalgunos de los principales museos de la rexón (el Muséu de Belles Artes d'Asturies, el Muséu del Xurásicu d'Asturies, el Muséu Marítimu d'Asturies y el Muséu de la Minería); seis de los sos organismos culturales más destacaos (el Centru Niemeyer, Llaboral Centru d'Arte y Creación Industrial, el Festival Internacional de Cine de Xixón, la Sociedá Internacional de Bioética, el Xardín Botánicu Atlánticu y la Fundación Archivo d'Indianos); institutos d'investigación (l'Institutu Nacional del Carbón, l'Institutu de Productos Lácteos d'Asturies, l'Institutu Universitariu d'Oncoloxía y ANM Investigaciones); amás de la empresa ArcelorMittal.

    Pela so parte, el proyectu Muséu Virtual d'Asturies consiste na digitalización de los elementos más representativos del patrimoniu cultural asturianu. Dientro del proyectu, en 2010 grabáronse prácticamente tolos museos d'Asturies y bona parte de los sos centros d'interpretación, y ellaboráronse reportaxes de vídeu nos qu'apurrieron la so conocencia especialistes de la mesma universidá y responsables de los museos y centros. Tanto los conteníos de MUVAS como los del Centru de Conocencia yá s'incorporaron a Europeana.


Buscar