Noticias

  • La Universidá d'Uviéu va ser centru desaminador del certificáu d'italianu PLIDA

    06 de Mayu 2011

    La institución académica firma un alcuerdu cola Asociación Dante Alighieri y amplía el catálogu de acreditación d'idiomes.

    Presentación del conveniu cola Asociación Dante Alighieri
    La Universidá d'Uviéu y l'Asociación Dante Alighieri suscribieron un conveniu pol que la institución académica asturiana va ser centru desaminador oficial del Certificáu d'italianu PLIDA (Proxecto Llingua Italiana Dante Alighieri). L'estudiante que supere les pruebes va llograr una acreditación de la Universidá 'La Sapienza' de Roma nos distintos niveles de llingua italiana pa estranxeros. Esti títulu tamién cunta cola reconocencia de los ministerios italianos d'Asuntos Esteriores y de Trabayu y Polítiques Sociales.

    La vicerrectora de Internacionalización y Cooperación al Desenvolvimientu, Ana María Fernández, destacó la importancia d'esti alcuerdu nel marcu del Campus d'Excelencia Internacional de la Universidá d'Uviéu y nel camín de la internacionalización. Fernández recordó qu'anguaño nun basta con saber un idioma, "ye necesariu acreditalo".

    La Casa de les Llingües va ser el centru encargáu de realizar los exames, con dos convocatories añales: mayu y noviembre, abiertes tantu a la comunidá universitaria como a la sociedá xeneral. La convocatoria de mayu va celebrase los díes 26 y 27 y quien deseye participar yá puede formalizar la so matrícula. .

    La representante de l'Asociación Dante Alighieri, Carmen Martín Alonso, destacó que l'italianu ye una de les llingües europees más estudiaes y que'l certificáu PLIDA ta reconocíu en tol mundu y estiéndese por 60 países.

    Esti nuevu certificáu xúntase a los que realiza la Universidá d'Uviéu: el DELE del Institutu Cervantes, qu'acredita la conocencia del español como llingua estranxera, y exames oficiales d'alemán del Goethe Institut; les pruebes IELTS d'inglés profesional y académicu, qu'otorga la Universidá de Cambridge y xestiona el British Council, y los diplomes DELF y DALF de francés, de l'Alianza Francesa.


Buscar