Noticias

  • La Universidá d'Uviéu robla la Declaración de Berlín sobre accesu abiertu a la conocencia

    25 de Ochobre 2013

    Esta iniciativa de la Sociedá Max Planck, qu'arrexunta a universidaes y centros de too el mundu, promueve la publicación n'internet de la producción científica y académica de la institución

    Vicente Gotor y Peter Gruss, nel intre del actu na Biblioteca del Edificiu Históricu

    La Universidá d'Uviéu xuntóse a la Declaración de Berlín sobre Accesu Abiertu a la Conocencia en Ciencies y Humanidaes. Nun actu en presencia del presidente de la Sociedá Max Planck --impulsora d'esta iniciativa--, Peter Gruss, el rector, Vicente Gotor, fixo entrega del manifiestu robláu qu'implica'l compromisu de la institución académica asturiana de publicar n'internet la so producción científica y académica. Más de 450 universidaes y centros d'investigación de too el mundu participen nesta iniciativa.

    El rector destacó'l compromisu de la institución académica asturiana col espardimientu y la divulgación del saber y col espíritu de la Declaración de Berlín. "Nun momentu de crisis como'l que vivimos y coles decisiones que tomen les editoriales, la importancia d'esta iniciativa ye innegable", esplicó. L'actu tuvo llugar na Biblioteca del Edificiu Históricu de la Universidá. "Esta sala simboliza tou lo que representen Max Planck y la Declaración de Berlín", aprofió Gruss, quien sorrayó que desque s'impulsó esta iniciativa va una década un 10 per cientu de les publicaciones científiques yá tienen accesu abiertu y otru 12 per cientu cuelguen les sos publicaciones n'abiertu nun plazu determináu.

    La Declaración de Berlín sobre Accesu Abiertu a la Conocencia en Ciencies y Humanidaes (Berlin Declaration on Open Access to Knowledge in the Sciences and Humanities) foi aprobada'l 22 d'ochobre de 2003, a propuesta de la Sociedá Max Planck (Open Access at the Max Plank Society, 2003). El movimientu d'Accesu Abiertu ye una iniciativa internacional que promueve l'accesu a la conocencia al traviés de la rede ensin restricciones técniques, económiques o alministratives y que s'aplica a la publicación y espardimientu de recursos electrónicos, como publicaciones científiques, materiales didácticos, etc. La Universidá tien como misión la tresmisión y la crítica de la ciencia y ta obligada a crear y caltener estructures qu'actúen como soporte de la investigación, la docencia y l'estensión universitaria.

    La Universidá d'Uviéu quixo sumase a esta propuesta coincidiendo cola celebración de la Selmana Internacional del Accesu Abiertu, y aprovechando la presencia de los responsables de la Sociedá Max Planck, Premio Príncipe d'Asturies de Cooperación Internacional.

    Cola firma de la Declaración de Berlín, la Universidá d'Uviéu comprometese a caltener y amontar el Repositorio Institucional como preséu pa depositar los documentos académicos xeneraos por esta institución que fueren financiaos con fondos públicos, y animar a la comunidá universitaria a publicar n'abiertu.


Buscar