Noticias

  • La Universidá d'Uviéu axunta a toles escueles y facultaes nuna feria pa presentar la so ufierta académica

    14 de Mayu 2015

    La II Feria Académica de la institución celebrará'l llunes, 18 de mayu, nel Centru Cultural Antiguu Institutu de Xixón y el xueves 21 nel Edificiu Históricu n'Uviéu

    Estudiantes de Bachiller a puntu de realizar los exames de PAU p'aportar a la Universidá.

    La Universidá d'Uviéu refuerza la promoción d'ufierta de títulos na segunda edición de la so Feria Académica, qu'anguaño va tener una doble cita, n'Uviéu y en Xixón, tres l'ésitu de participación del añu pasáu. La feria, entamada dende'l Vicerrectorado d'Estudiantes, axunta a toles facultaes y escueles y supon un puntu de referencia p'aquellos alumnos que'l próximu añu empecipien la so andadura universitaria. La II Feria Académica va celebrase'l llunes, 18 de mayu, nel Centru Cultural Antiguu Institutu de Xixón y el xueves 21 nel patiu del Edificiu Históricu, en dambos casos va empezar a les 17:00 hores.

    Ente les novedaes más destacaes pal próximu cursu, la institución académica refuerza'l so apueste pola internacionalización y enllanta dos nuevos itinerarios billingües de grau: grau en Maestru de Primaria y grau n'Inxeniería de Tecnoloxíes Industriales. El Campus d'Excelencia Internacional impulsó, col patrociniu de Liberbank, los programes billingües pa facilitar la movilidá de los nuesos estudiantes y la captación de nuevos talentos estranxeros. Casi 700 alumnos cursen na actualidá un grau billingüe na Universidá d'Uviéu y el próximu cursu la ufierta va aumentar hasta les 17 titulaciones.

    Dos nuevos itinerarios billingües de grau y el primer títulu on line son les principales novedaes del cursu 2015-2016

    El cursu 2015-2016 va ser amás el de la implantación del primer grau on line na Universidá d'Uviéu. Con una ufierta de 40 places, Xestión y Alministración Pública va ser la primer titulación oficial de grau que pueda cursase on line na institución académica asturiana.

    Les 19 facultaes y escueles de la Universidá d'Uviéu van tar presentes nel alcuentru con información específica sobre caúna de les sos titulaciones. Miembros de los equipos decanales van atender les duldes de tolos comenenciudos. El Centru d'Orientación ya Información al Estudiante (COIE) tamién va allegar a la feria p'arreglar cualquier dulda relativa a la ufierta académica de la institución, les Pruebes d'Accesu a la Universidá (PAU), les beques disponibles pa estudiantes, posibilidaes d'agospiamientu pa universitarios o les distintes víes d'accesu a estudios universitarios.

    Coles mesmes, la Casa de les Llingües tamién va esponer la so ufierta de cursos de formación n'idiomes y d'español pa estranxeros. Amás, el Serviciu de Deportes de la Universidá va cuntar con un stand nel que públicu va poder conocer toles instalaciones y ufierta d'actividaes nos distintos campus.

    Imaxes:


Buscar