Noticias

  • La Universidá d'Uviéu axunta a espertos internacionales en bandes sonores

    11 de Avientu 2012

    Profesores d'universidaes españoles y estranxeres van encetar el procesu de composición y l'estética musical en soportes como'l cine, la publicidá, los videoxuegos o les series de televisión, ente otros

    Mientres tres díes los espertos van encetar la importancia que la música tien en distintos productos culturales.

    Qué procesu se sigue pa crear la música d'un anunciu publicitariu, un videoxuegu o la banda sonora d'una película. Qué implicaciones estétiques y técniques tien componer melodíes pa los distintos soportes audiovisuales. Son dalgunes de les cuestiones que se van encetar en VII Simposio Internacional La creación musical na banda sonora, que se va desenvolver na Universidá d'Uviéu dende mañana miércoles hasta'l 14 d'avientu.

    La institución académica asturiana toma'l relevu a Salamanca na organización d'esti alcuentru internacional nel que participen profesores d'universidaes españoles y de centros estranxeros como les universidaes de Liverpool, Medellín (Colombia) o Padova (Italia). Les sesiones van desenvolvese fundamentalmente'l 13 y 14 d'avientu, con una conferencia a manera de prólogu'l 12 d'avientu.

    Per primer vegada, la xunta d'espertos da cabida nel so programa al papel que la música xuega non yá nel cine sinón n'otros soportes audiovisuales como la publicidá, los videoxuegos o les series de televisión, ente otros.

    L'alcuentru internacional enmárcase dientro de les actividaes de l'Aula Pop Rock d'Estensión Universitaria nel so intentu por diversificar la ufierta d'actividaes académiques y culturales a los miembros de la comunidá universitaria y a la sociedá asturiana polo xeneral.

    Mientres tres díes los espertos van encetar la importancia que la música tien en distintos productos culturales dende les perspectives más variopintes. Asina, les distintes meses van detenese en propuestes tan distintes como les bandes sonores del cine mudu, el llinguaxe musical de Enio Morricone, la creación musical pa un trailler cinematográficu y un spot de televisión o les recreaciones que les series de televisión fixeron de los musicales clásicos.

    El simposio van celebrase na Facultá de Filosofía y Lletres (Edificiu d'alministración). El programa inclúi dos conferencies plenaries: Migraciones y música pop na España de los sesenta: el cine a entrambos llaos del espeyu, al cargu de Josep Lluís i Falcó (Universidá de Barcelona) y New Media Forms and New Audiu-visual Relationships, pronunciada'l profesor Anahid Kassabian (Institute of Popular Music, University of Liverpool). Los conteníos íntegros de la programación y los trámites de matrícula pueden consultase nel blogue d'Estensión Universitaria.


Buscar