Noticias

  • La Universidá d'Uviéu anueva los miembros del so Conseyu de Gobiernu

    10 de Xunu 2016

    L'órganu executivu incorpora, a propuesta del rector, a representantes de les Escueles Politécniques de Xixón y Mieres, y de la Facultá d'Economía y Empresa. El conseyu aprueba tamién 63 nueves places docentes: 43 d'ayudantes doctores y 20 de profesores asociaos

    Consejo de Gobierno.
    La Universidá d'Uviéu actualizó esta mañana los integrantes del so Conseyu de Gobiernu cola incorporación de 15 nuevos miembros a propuesta del rector, Santiago García Granda. El máximu responsable de la institución académica informó esti mediudía de los principales alcuerdos adoptaos pol órganu de gobiernu de la Universidá, na primer xunta tres el relevu nel rectoráu.
     
    Santiago García Granda destacó que'l nuevu Conseyu de Gobiernu incorpora a centros hasta agora non representaos, como la Escuela Politécnica d'Inxeniería de Xixón, la Escuela Politécnica de Mieres y la Facultá d'Economía y Empresa. El rector indicó tamién que nel órganu de gobiernu va tar presente'l candidatu al rectoráu nes pasaes elecciones Agustín Mariña, una representante del Conseyu d'Estudiantes y dos nuevos miembros del PDI y de la PAS.
     
    El Conseyu de Gobiernu de la Universidá aprobó, amás, 63 nueves places docentes: 43 d'ayudantes doctores y 20 d'asociaos. Juan José del Coz, vicerrector d'Organización Académica, sorrayó que l'oxetivu d'estes nueves places ye evitar la figura de los asociaos impropios. De les 20 nueves places d'asociaos, dos son pa 3H y 4H (con una carga llaboral d'ente 60 y 90 hores), y 18 pa 6H (con un máximu de 180 hores). El rector añedió que'l propósitu del equipu que dirixe ye priorizar la figura de los ayudantes doctores, la máxima que dexa la llei pa personal non permanente nun suxetar a tasa de reposición, frente a los asociaos.
     
    L'órganu de gobiernu de la Universidá alcordó tamién la designación de los representantes de les comisiones delegaes del Conseyu de Gobiernu y de los miembros del Conseyu de Gobiernu nel Conseyu Social. Precisamente, a esti últimu órganu van incorporase: Rocío Aza, estudiante; Xabiel García Pañeda, Delegáu Coordinación y Estratexa Universitaria; y Rita Nespral, representante del Personal d'Alministración y Servicios.
     
    Mientres la xunta del conseyu, desenvuelta esta mañana, aprobóse tamién el procedimientu d'almisión y matrícula de másteres universitarios pal cursu 2016-2017. Juan José del Coz informó de l'apertura d'un plazu de preinscripción estraordinaria hasta finales de mes pa dos másteres de recién aprobación, el máster oficial d'Inxenieru de Caminos, Canales y Puertos y el máster universitariu d'Intelixencia de Datos. El rector avanzó que dambos van poder cursase na Universidá d'Uviéu a partir de setiembre ya indicó que, nel casu del máster de Caminos, dirá contratándose nuevu personal en función de les necesidaes venceyaes a la so implantación.
     
    A lo último, el Conseyu de Gobiernu dio'l vistu bonu al informe financieru y d'execución presupuestaria del primer trimestre. El rector destacó la normalidá tantu nel gastu como en tesorería y añedió que l'informe va ser unviáu al  Conseyu Social que se va axuntar el próximu día 20.

    Imaxes:


Buscar