Noticias

  • La Universidá d'Uviéu refuerza les sos relaciones con China

    24 de Mayu 2011

    La institución académica prepara alcuerdos de movilidá con cinco universidaes de la provincia de Shandong.

    Alcuentru institucional na Universidá de Linyi
    La Universidá d'Uviéu prepara nuevos alcuerdos de movilidá internacional d'estudiantes con cinco universidaes chines de la provincia de Shandong. La vicerrectora de Internacionalización y Cooperación al Desenvolvimientu, Ana María Fernández, acaba de realizar una nueva visita institucional a China p'abrir nueves víes de collaboración y consolidar convenios yá suscritos.

    La movilidá de los estudiantes ye una de les llínees que quier impulsase dende'l Campus d'Excelencia Internacional de la Universidá d'Uviéu y exa tresversal del proyectu Ad Futurum. Nel proyectu presentáu a la convocatoria 2011 del Subprograma de Fortalecimientu, modalidá d'Afitamientu, la institución académica presentó dos remanes pa tender pontes con China: Ástur-China Bridge y Ástur-China Mobility Grants.

    Nesti últimu viaxe a China, la Universidá d'Uviéu caltuvo dellos alcuentros institucionales con universidaes que cunten con departamentu d'español. La primer cita foi na Universidá de Weihai, con quien la institución académica asturiana suscribió un alcuerdu marco de collaboración el pasáu mes de noviembre. Nesti alcuentru concretáronse acciones futures rellacionaes cola movilidá d'estudiantes.

    Na Universidá de Qingdao, la vicerrectora de Internacionalización y Cooperación al Desenvolvimientu suscribió un memorándum d'intenciones pa empezar a trabayar en proyectos conxuntos que se van afigurar en diversos convenios. L'oxetivu principal ye promover la movilidá d'estudiantes nuna doble dirección: estudiantes procedentes de China qu'alleguen a la Universidá d'Uviéu a concluyir los sos estudios de Grau o a cursar un Máster Universitariu, y qu'alumnos asturianos cursen estudios de chinu pa estranxeros en branu, nel país asiáticu. Tamién s'establecieron contactos cola Shandong Normal University en Jinan y la Shandong International University, dambes na rexón de Shandong, la segunda más poblada de China.

    Enllaces Rellacionaos:


Buscar