Noticias

  • La Universidá d'Uviéu recibe esti cursu a 36 alumnos del programa Ciencia ensin Fronteres de Brasil

    05 de Setiembre 2012

    La institución académica asturiana foi escoyida teniendo en cuenta la so calidá docente, excelencia n'investigación, tresferencia de conocencia y servicios d'acoyida.

    Mientres el mes de setiembre la Universidá d'Uviéu va recibir 36 estudiantes brasileños becaos pol programa Ciencia ensin Fronteres de Brasil, nel que tamién participen otres 38 universidaes españoles. Esti programa respuende a una iniciativa promovida dende'l gobiernu brasileñu, ya impulsada directamente pola so presidenta Dilma Rouseff, por aciu la cual pretende favorecese la presencia d'estudiantes, profesores ya investigadores brasileños n'instituciones internacionales d'excelencia, según amontar la presencia d'académicos estranxeros n'instituciones brasileñes. L'oxetivu final que s'escuerre ye desenvolver el capital intelectual de Brasil n'aspeutos clave rellacionaos cola ciencia, la tecnoloxía y l'innovación.

    Asina, ta previstu que'l volume total de beques concedíes pol gobiernu brasileñu pa los distintos tipos de movilidaes contemplaes nesti programa supere les 100.000 dientro de los próximos cuatro años, pa lo que se cunta con un presupuestu de más de 1.600 millones de dólares. Los intercambios llevaranse a cabu con universidaes escoyíes d'Estaos Xuníos, Reinu Uníu, Alemaña, España, Francia ya Italia.

    El Programa xestiónase al traviés del Conseyu Nacional de Desenvolvimientu Científicu y Tecnolóxicu (CNPq) de Brasil, quien s'encarga de la selección de los estudiantes, profesores ya investigadores brasileños en base a criterios d'excelencia. De la mesma, la Fundación Universidad.es, dependiente del Ministeriu d'Educación, Cultura y Deporte, desenvuelve los llabores de coordinación ente'l CNPq y les universidaes españoles que formen parte del Programa y tamién participó viviegamente nel rigorosu procesu de selección al que fueron sometíes les universidaes pa participar nesta iniciativa, ente elles la Universidá d'Uviéu. Los criterios consideraos pa la selección de les instituciones de referencia tuvieron en cuenta la so calidá docente, la excelencia n'investigación, el grau de tresferencia de conocencia, el so nivel de internacionalización y los servicios d'acoyida disponibles.

    Ésitu de convocatoria ente espedientes brillosos

    La 1ª convocatoria del programa Ciencia ensin Fronteres pal cursu 2012 – 2013 abriose pa la modalidá de "estancies pa estudiantes brasileños de grau", de tala forma que ufiertáronse beques de movilidá d'un añu académicu de duración cola posibilidá de cursar diverses asignatures de grau, hasta un máximu de 60 creitos. Les universidaes brasileñes tuvieron de plazu hasta'l 14 de mayu de 2012 pa postular ante'l CNPq a los estudiantes con meyor espediente académicu, con cuenta de que fueren axudicatarios d'una de les beques ufiertaes pa estudiar nuna Universidá española. El Programa foi un atayante ésitu cuidao que se llograron más de 9.600 solicitúes pa les 1.551 places ufiertaes dende España.

    Teniendo en cuenta les árees prioritaries del programa Ciencia ensin Fronteres de Brasil la Universidá d'Uviéu ufiertó en marzu de 2012 un total de 36 places distribuyíes ente'l Grau en Química, Grau n'Inxeniería Química, Grau n'Inxeniería Informática y Tecnoloxía de la Información y Grau en Biotecnoloxía. Esta ufierta formativa cubrióse hasta la so totalidá.

    Los alumnos reciben una beca mensual pa la so estancia nel nuesu país ente que el CNPq encargase de satisfaer los costos de la so matrícula col llabor d'intermediación de la Fundación Universidad.es. Una vegada n'Asturies, la Oficina de Relaciones Internacionales de la Universidá d'Uviéu, dependiente del Vicerrectorado de Internacionalización y Posgráu, encargase del procedimientu de rexistru y acoyida d'estos alumnos, ente que los responsables de relaciones internacionales de cada Centru asesóren-yos académicamente pal diseñu del so programa d'estudios.


Buscar