Noticias

  • La Universidá d'Uviéu reabre'l Colexu Mayor América en rematando la obra de rehabilitación

    02 de Setiembre 2014

    L'equipamientu ufierta 72 nueves places d'agospiamientu pa universitarios, que yá tán cubiertes de cara al cursu qu'empieza

    Un momentu del actu de reapertura celebráu nel antepar del colexu mayor.

    La Universidá d'Uviéu reabre esti cursu'l Colexu Mayor América en completando les obres de rehabilitación integral del edificiu. L'equipamientu ufierta un total de 72 places d'agospiamientu que yá tán completes de cara al cursu qu'empieza y recibiéronse más solicitúes que queden en llista d'espera. De les 72 places disponibles, 69 van ser ocupaes por estudiantes y trés van destinar a profesores y personal universitario.

    El Rector, Vicente Gotor, y la conseyera d'Educación, Cultura y Deporte, Ana González, acompañaos d'otres autoridaes visitaron esta mañana les instalaciones del colexu mayor, qu'a partir d'esta selmana va recibir a los primeres estudiantes.

    La Conseyería d'Educación, Cultura y Deporte del Principáu d'Asturies y l'Universidá d'Uviéu encararon la obra de rehabilitación. Les obres dotaron al colexu de 72 habitaciones individuales con bañu incorporáu, teléfonu y conexón WIFI.

    Les zones comunes inclúin biblioteca, sales d'estudiu, conferencies ya informática, salón de televisión con DVD, xuegos de mesa y videoxuegos, restorán autoserviciu y cafetería, zona ajardinada y aparcamientu propiu. El colexu cunta con habitaciones y espacios dafechu afechos pal usu de discapacitaos.

    Los trabayos de remodelación incluyeron tamién la habilitación d'un centru de tresformamientu pal suministru eléctricu y meyores nel suministru de gas. Toles instalaciones fueron forníes con nuevu moblame. L'agospiamientu cunta con serviciu de llimpieza y mantención, y un completu plan d'actividaes culturales, según orientación académica y profesional.

    La reapertura del Colexu Mayor América completa la ufierta de places d'agospiamientu de la Universidá d'Uviéu sumándose al Colexu Mayor San Gregorio y la Residencia Universitaria de Mieres. Unu de les exes estratéxiques d'actuación del Campus d'Excelencia Internacional foi ampliar y ameyorar la ufierta d'agospiamientu de la institución académica.


Buscar