Noticias

  • La Universidá d'Uviéu prepara les sos II Xornaes Doctorales nel Campus de Mieres

    11 de Ochobre 2012

    El plazu d'inscripción pa los doctorandos cierra'l próximu 5 de noviembre

    Imaxe de grupu de participantes nes Xornaes Doctorales de 2011.

    La Universidá d'Uviéu va celebrar les sos II Xornaes Doctorales los próximos 29 y 30 de noviembre nel Campus de Mieres. Tres l'ésitu collecháu na primer convocatoria'l Centru Internacional de Posgráu yá abrió'l plazu d'inscripción pa toos vos doctorandos comenenciudos en participar.

    Aquellos que quieran allegar a les II Xornaes Doctorales tienen d'unviar el formulariu d'inscripción cubiertu al corréu electrónicu infopostgrado@uniovi.es antes del 5 de noviembre a les 12:00 hores. La inscripción ye gratuita pa los doctorandos de la Universidá d'Uviéu.

    La II Xornaes de Doctoráu de la Universidá d'Uviéu enmárquense dientro de les actividaes del Programa de Formación Tresversal de Doctoráu, qu'anguaño se punxo en marcha dende'l CIP.

    Amás de poner en contactu a investigadores y empreses y averar a la sociedá'l trabayu que realicen los doctorandos de la Universidá d'Uviéu, les Xornaes van poner anguaño'l focu sobre diversos asuntos d'interés pa los mozos investigadores como son:

    • La comunicación y divulgación de la investigación.
    • La xeneración de recursos pa financiar el desenvolvimientu de la investigación.
    • La tresferencia de les resultancies de la investigación escontra la empresa.

    El programa d'actividaes combina ponencies, paneles y sesiones participatives, a lo llargo de dos díes de trabayu. Les Xornaes van incluyir tamién la esposición y, anguaño como novedá, la presentación oral, per parte de los doctorandos, de los pósteres nos qu'afiguren el so proyectu de tesis doctoral y meyores na investigación.

    Los pósteres van ser evaluaos por un xuráu y por los mesmos doctorandos participantes nes Xornaes, otorgándose dos tipos de premios: el del xuráu y el de los participantes. En cada casu, el ganador va recibir 300 euros y un diploma. Amás, va escoyer a los doctorandos que van representar a la Universidá d'Uviéu nes I Xornaes Doctorales del G9 que van tener llugar nel Campus de Mieres nel mes d'avientu.


Buscar