Noticias

  • La Universidá d'Uviéu participa na Selmana Europea de la Educación Cimera en Vietnam

    17 de Payares 2014

    La institución asturiana presentó la so ufierta de posgráu na feria, qu'axuntó a 80 espositores de la Unión Europea

    Stand de la Universidá d'Uviéu na Seman Europea de la Educación en Hanoi.

    La Universidá d'Uviéu participó na Selmana Europea de la Educación Cimera que se celebró la pasada selmana en Vietnam. La institución académica asturiana amosó nel alcuentru la so ufierta de posgráu.  La Feria axunta a más de 80 espositores ente los que s'atopen 19 axencies y embaxaes que representen a los sistemes nacionales de los Estaos miembros de la UE, y más de 70 universidaes ya instituciones d'educación cimera de 24 Estaos miembros de la Unión Europea.

    El director de la Oficina de Internacionalización de la Universidá d'Uviéu, Humberto Rodríguez Solla, representó a la institución académica na feria celebrada en Hanoi y participó nun foru de discutiniu sobre Universidá y Cooperación pa falar sobre les prioridaes estratéxiques de Vietnam nel ámbitu de la educación cimera; esaminar estudios de casu de proyectos de cooperación rellacionaos con universidaes acomuñaes de Vietnam y los Estaos miembros de la UE y aldericar sobre escurres y oportunidaes pa proyectos futuros, nun eventu de 'matchmaking' pa les universidaes.

    La delegación asturiana tamién tomó parte nel Foru Universidá-Empresa entamáu pola Universidá de Hanoi de Ciencia y Tecnoloxía. Investigadores vietnamites y europeos celebraron un alcuentru dientro del Junior Club Investigadores de la Universidá Nacional de Vietnam.


Buscar