Noticias

  • La Universidá d'Uviéu entama'l 21º Congresu mundial sobre Dificultaes del Aprendizaxe

    Del 05/09/2012 al 07/09/2012

    Espertos internacionales van analizar, ente'l 5 y el 7 de setiembre, n'Uviéu los últimos afayos ya investigaciones sobre los factores que pueden influyir el procesu d'aprendizaxe en neños y adolescentes.

    Alcuentru con periodistes pa presentar el congresu

    La Universidá d'Uviéu y l'asociación internacional Learning Disabilities Worldwide entamen el 21º Congresu mundial sobre Dificultaes del Aprendizaxe, que se va desenvolver nel Palaciu de Congresos y Esposiciones d'Uviéu del 5 al 7 de setiembre. L'alcuentru va axuntar n'Asturies a 300 espertos de too el mundu nel campu de les dificultaes del aprendizaxe procedentes d'una ventena de países y más de 50 universidaes.

    El congresu, que per segunda vegada celébrase fora d'Estaos Xuníos, ta entamáu pola Facultá de Formación del Profesoráu y Ciencies de la Educación, el Departamentu de Psicoloxía y el Departamentu de Ciencies de la Educación de la Universidá d'Uviéu.

    Los investigadores van aldericar y van analizar les últimes meyores y conclusiones nesta disciplina emprestando especial atención a los factores d'influencia que pueden enzancar los trés aprendizaxes básicos: llectura, escritura y cálculu.

    Les dificultaes d'aprendizaxe son una realidá diaria nos centros educativos. N'España, envalórase qu'unos 100.000 alumnos d'educación infantil, primaria y secundaria presenten dalgún tipu de dificultá d'aprendizaxe atendida como una necesidá educativa especial. En países como Estaos Xuníos esa cifra alzase hasta los trés millones d'alumnos.

    Los espertos estremen de manera clara los problemes d'aprendizaxe que pueda sufrir un alumnu del conceutu de fracasu escolar que davezu s'aplica al rendimientu individual.

    El programa del congresu inclúi un total de 17 tópicos temáticos que van encetar de manera específica dalgunes de les dificultaes más habituales como pueden ser el déficit d'atención, la hiperactividad, la dislexa, los problemes de fala y llinguaxe, la xestión de l'aula, les dificultaes d'aprendizaxe n'adultos o'l papel de les nueves tecnoloxíes como ferramienta aplicable a les necesidaes educatives especiales.

    La Universidá d'Uviéu entamó esti prestixosu alcuentru internacional en collaboración cola asociación Learning Disabilities Worldwide, una organización que trabaya en tol mundu p'ameyorar les resultancies educatives, profesionales y personales de les persones con dificultaes d'aprendizaxe y otros trestornos rellacionaos.

    Enllaces Rellacionaos:


Buscar