Noticias

  • La Universidá d'Uviéu incorpora la realidá aumentada al so Edificiu Históricu

    02 de Xunetu 2012

    Esta nueva tecnoloxía al traviés de códigos QR facilita al visitante una completa información técnica ya imaxes n'altu resolvimientu y 3D del patrimoniu universitariu

    Una visitante del Edificiu Históricu consulta la información de realidá aumentada nel so móvil, per mediu del códigu QR.

    La Universidá d'Uviéu incorporó la realidá aumentada al so Edificiu Históricu coincidiendo col entamu d'una nueva edición de visites empuestes, a partir d'esti llunes, 2 de xunetu. Con esta nueva tecnoloxía, el visitante non yá va poder contemplar el patrimoniu históricu artísticu en directu sinón que va tener accesu a una completa ficha de cada obra, ya inclusive a imaxes en 3D nel casu de les escultures, al traviés del so teléfonu móvil. Pa ello, la institución académica instaló códigos QR, un sistema similar a un códigu de barres que dexa al usuariu aportar de forma gratuita a información complementaria ya imaxes n'altu resolvimientu de les obres d'arte dende la so smartphone.

    La realidá aumentada combina'l mundu real col mundu virtual, lo que dexa ufiertar mayor información al visitante. Esta tecnoloxía tien una amplia gama de posibilidaes pa recrear redolaes virtuales, magar la so implantación ta entá pocu estendida n'España y casi siempres llindada a la descripción de ciudaes o rutes turístiques.

    La Universidá d'Uviéu optó por un modelu senciellu y accesible a tolos usuarios que dispongan d'un móvil smartphone, yá que se basa nun senciellu códigu QR al que s'apuerta con un solu clic nel teléfonu. La esperiencia foi posible gracies a la GAUDEO (Galería Virtual de la Universidá d'Uviéu) qu'inclúi una visita esférica en 360 graos del edificiu históricu y una completa galería n'alta definición, con información especializada de más de 40 obres del patrimoniu universitariu: dende'l retablu de la Capiya Universitaria, la galería de llenzos de los rectores, vidreres, escultures y pieces de moblame.

    Cada pieza ta señalizada con un códigu QR que va dirixir directamente al visitante al traviés del móvil a GAUDEO. D'esta forma, daquién que tea ante la Mater Doliosa, por casu, va ver la pieza orixinal y va poder tamién aportar a la so ficha técnica ya inclusive va llograr una visión en 3D virtual de la escultura.

    Una hora espléndida

    La incorporación del Edificiu Históricu de la Universidá a la realidá aumentada coincide cola puesta en marcha del programa de visites empuestes Una hora espléndida, qu'ufierta la posibilidá de percorrer estancies del emblemáticu inmueble universitariu, convertíu dende'l pasáu añu en Centru Cultural d'Estensión Universitaria LAUDEO, xeneralmente inaccesibles al públicu.

    Les visites, totalmente gratuites, van empezar el llunes, 2 de xunetu y van enllargase hasta'l 31 d'agostu. De llunes a vienres a les 12:00 y a les 17:00 hores, y el sábadu a les 12:00 hores, mientres el mes de xunetu; y de llunes a vienres a les 11:00 y a les 12:30 hores, n'agostu. Como l'añu anterior, les entraes van poder recoyese na Tienda Universitaria, nel patiu del Edificiu.

    Nesta nueva edición de Una hora espléndida, la Universidá cunta cola collaboración del Conceyu d'Uviéu, dientro del nuevu marcu de collaboración ente la institución académica y el consistoriu uvieín, que va promocionar al traviés de los sos puntos d'información turística'l ciclu de visites empuestes.

    La puerta virtual escontra GAUDEO

    El códigu QR (quick response code, «códigu de respuesta rápida») ye un sistema p'almacenar información nuna matriz de puntos o un códigu de barres bidimensional. GAUDEO, la Galería Virtual de la Universidá d'Uviéu, dispon d'un códigu propiu pa facilitar l'accesu dende cualquier llugar.

    Anque dellos teléfonos intelixentes yá incorporen aplicaciones pa lleer códigos QR, esisten ensame d'opciones según la plataforma del terminal móvil (iPhone, Android, Symbian o BlackBerry) por que el usuariu pueda descárgales gratuitamente dende'l so propiu teléfonu.

    Una vegada descargada l'aplicación ya instalada nel móvil, namá hai que abrir, enfocar cola cámara del teléfonu'l códigu QR, esperar unos segundos a que lo detecte y automáticamente va dirixise al puntu onde s'atopa la información complementaria.

    Enllaces Rellacionaos:


Buscar