Noticias

  • La Universidá d'Uviéu robla'l primer conveniu d'una universidá española col CERN

    05 de Setiembre 2014

    Dambes instituciones suscriben un alcuerdu pa promover la investigación conxunta nel campu de la física, les matemátiques y l'inxeniería

    D'esquierda a derecha, Paz Suárez Rendueles, Luis Secundino Miralles, Vicente Gotor y Víctor Manuel González.

    La Universidá d'Uviéu ye la primer española en cerrar un conveniu de collaboración cola Organización Europea pa la Investigación Nuclear (CERN). Dambes instituciones van potenciar la investigación nel ámbitu de la física fundamental, la matemátiques y l'inxeniería (software, mecánica, eléctrica, electrónica, de control y telecomunicaciones). 

    El prestixosu llaboratoriu européu algamó alcuerdos de collaboración con una amenorgada llista d'universidaes en tol mundu y nel casu d'España la institución académica asturiana ye la primera y única universidá que suscribió un conveniu. Dende va siete años la Universidá d'Uviéu y el CERN caltien una collaboración constante, frutu de la cual más de 70 titulaos asturianos completaron yá estancies d'hasta 3 años nos llaboratorios de la Organización Nuclear Europea.

    El rector, Vicente Gotor, robló esta mañana'l documentu marco del alcuerdu con vixencia d'otros cinco años al pie de Lluís Secundino Miralles Verge, director del Departamentu de Servicios d'Infraestructures del CERN. La vicerrectora d'Investigación y Campus d'Excelencia Internacional, Paz Suárez Rendueles, y el profesor Víctor Manuel González, coordinador del proyectu per parte de la Universidá, allegaron tamién a la firma del conveniu.

    Amás, la prestixosa institución científica, galardonada'l pasáu añu col Premiu Príncipe d'Asturies d'Investigación Científica y Técnica, escoyó la institución asturiana pa celebrar el pasáu abril el so primer Campus de Primavera n'España cola participación de 80 estudiantes.

    L'alcuerdu suscritu güei contempla múltiples campos collaboración ente el investigadores de la Universidá d'Uviéu y l'equipu científicu del CERN como'l software de control del acelerador, Física de partícules, Inxeniería de Seguridá y Servicios de Mediu Ambiente, Inxeniería Eléctrica, Control Industrial ya Inxeniería, Inxeniería Mecánica y de Materiales, Sistemes avanzaos d'Información, Inxeniería d'Obres, Xestión y Soporte de Servicios o'l desenvolvimientu de software pa instalaciones informátiques.

    Dambes instituciones comprométense amás a la publicación conxunta de les resultancies de la investigación en Open Access. El investigadores y alumnos de la Universidá que participen en dalguna de les actividaes conxuntes van poder ser consideraos como miembros acomuñaos del personal del CERN.


Buscar