Noticias

  • La Universidá d'Uviéu apurre los sos premios estraordinarios na festividá de Santu Tomás de Aquino

    27 de Xineru 2014

    Un total de 44 estudiantes recueyen nel Paraninfu los galardones de Llicenciatura y Doctoráu que concede la institución académica asturiana

    Semeya de familia de los galardonaos col Rector.

    La Universidá d'Uviéu fixo entrega de los Premios Estraordinarios de Llicenciatura y Doctoráu nel actu solemne de Santu Tomás de Aquino, presidíu pol  rector, Vicente Gotor, y que cuntó cola asistencia de la conseyera d'Educación, Cultura y Deporte, Ana González, ente otres autoridaes polítiques y académiques. El cortexu, integráu por casi un centenar de profesores revistíos, marcó l'entamu del actu nel que'l presidente del comité executivu de la Fundación pa la Ciencia del País Vascu (Ikerbasque), Fernando Cossío, foi l'encargáu d'impartir la conferencia inaugural de la festividá.

    El rector animó a los mozos colos espedientes más brillosos a siguir una carrera investigadora na institución académica. Destacó, amás, l'apueste que nos últimos años viénose realizando dende'l Centru Internacional de Posgráu pa potenciar los programes de doctoráu. Asina, señaló la bona acoyida que tuvieron les Xornaes Doctorales "nes que somos pioneros y que son una plataforma inmeyorable p'axuntar a la cazumbre nueva de la nuesa investigación". La formación tresversal y la internacionalización de los programes son tamién pilastres básiques del apueste pola formación de doctoráu.

    Vicente Gotor tamién remarcó'l papel del Campus d'Excelencia Internacional como impulsor d'acciones estratéxiques pa la Universidá. Les acciones de captación de talentu y los programes de movilidaes d'excelencia contribúin de manera decisiva" a la necesaria internacionalización de la institución académica asturiana.

    El catedráticu Fernando Cossío Mora, Director Científicu de la Basque Foundation for Sciencie esbilló na so conferencia dalgunes de les acciones que se punxeron en marcha nel País Vascu pa impulsar la investigación. Asina, esplicó que dende la so fundación va cinco años, Ikerbasque alcordó la incorporación de 275 investigadores en distintes modalidaes, d'ellos 95 fueron científicos visitantes. Les convocatories internacionales de la fundación atraxeron a investigadores de toles cañes de la conocencia procedentes de más d'una ventena de países. "¿Puédese reclutar, retener y repatriar investigadores?", preguntóse Cossío pa rematar la so intervención. La respuesta, añedió, ye "sí, y amás ye económicamente vidable".

    Un total de 21 estudiantes recoyeron el so Premiu Estraordinariu de Llicenciatura y otros 20 los Premios Estraordinarios de Doctoráu. Amás, fíxose entrega de los dos premios especiales qu'otorga la Facultá de Derechu y Premio Luis Suárez Estrada, concedíu pol Conseyu Social de la Universidá d'Uviéu a la Facultá d'Economía y Empresa.

    Imaxes:


Buscar