Noticias

  • La Universidá d'Uviéu apurre los diplomes a los alumnos de PUMUO

    24 de Xunu 2014

    El Rector presidió nel Paraninfu l'actu de graduación de 13 alumnos del programa d'Universidá pa Mayores

    Semeya de familia colos graduaos tres l'actu d'entrega de diplomes.

    El Paraninfu del Edificiu Históricu acoyó la entrega de diplomes a los 13 alumnos del Programa Universitariu pa Mayores de la Universidá d'Uviéu (PUMUO) qu'anguaño se graduaron. El rector de la Universidá d'Uviéu, Vicente Gotor, presidió la graduación, acompañáu pola conseyera de Bienestar Social y Vivienda del Principáu d'Asturies, Esther Díaz; el subdireutor xeneral de Caxa Rural, Antonio Romero Casáu, en representación de la entidá bancaria que collabora nel desenvolvimientu de PUMUO; el vicerrector d'Estudiantes, Luis Rodríguez Muñiz, y la directora d'área de Proyección Social, Marta Pérez Toral. 

    Amigos y familiares acompañaron a los nuevos graduaos nel actu. El rector emponderó l'actitú d'aquellos que deciden averase a la Universidá ensin prexuicios d'edá y felicitólos por llograr completar los sos estudios. Tamién Esther Díaz felicitó a los universitarios graduaos y remarcó el compromisu del gobiernu rexonal colos mayores p'apurri-yos opciones d'avieyamientu activu y saludable.

    Tamién dos representantes de los alumnos tomaron la palabra pa faer balance de los sos años universitarios como una esperiencia positiva y enriquecedora no personal y no intelectual. 

    El programa de PUMUO tien una duración de cinco año académicos y consta d'una parte obligatoria, formada por asignatures comunes pa tol alumnáu, una parte optativa col formatu de talleres y qu'atiende intereses más concretos de cada matriculáu, y una ufierta de llibre elección nel marcu de l'actividá cultural desenvuelta pola Universidá.


Buscar