Noticias

  • La Universidá d'Uviéu edita'l conciertu homenaxe del Xixón Sound a Leonard Cohen

    01 de Febreru 2012

    First we take Milán inclúi un CD y un DVD col tributu directu que los artistes asturianos celebraron nel Paraninfu universitariu por cuenta de la entrega del Premio Príncipe de les Lletres al cantautor canadiense.

    Carpeta col DVD y el CD de First we take Milán

    El soníu del Xixón Sound torna nel proyectu First we take Milán, una iniciativa de la Universidá d'Uviéu por que les sos exalumnos, integrantes de delles de les bandes más populares del soníu indie nos noventa, homenaxaren a Leonard Cohen por cuenta de la concesión del Premio Príncipe d'Asturies de les Lletres.

    Esti proyectu ve agora la lluz nuna orixinal carpeta con doble soporte -CD y DVD-, editada pol Vicerrectorado d'Estensión Universitaria, Cultura y Deportes de la Universidá d'Uviéu, que contien el conciertu en directu que los músicos asturianos tributaron al artista canadiense nel Paraninfu –el llugar más emblemáticu d'una institución con 400 años d'hestoria-, el 20 d'ochobre de 2011, coincidiendo cola selmana de la entrega de los Premios Príncipe d'Asturies.

    Cada artista tuvo especial curiáu n'escoyer ya iguar dalgunu de los grandes ésitos de Cohen pa ufiertar versiones bien personales y úniques. Nacho Vegas decantose pa esti particular proyectu por L'Estranxeru y una versión orixinal en llingua asturiana, acompañáu por Montse Álvarez y Mar Álvarez, d'El Partisanu. El percorríu polos grandes ésitos de Cohen sigue cola adaptación de Suzanne fecha per Mar Álvarez y l'oportunidá d'escuchar na voz de la ex batería de Manta Ray Xabel Vegues en Famous blue rain coat. Igor Paskual (Babylon Chat) pasó pol so cribu personal el Hallelujah y Fany Álvarez y José Luis García (Elle Belga) revisitaron xuntos Who by fire. El conocíu So long Marianne cuerre al cargu de Montse Álvarez (Nosoträsh) y la tema que parafrasia'l títulu de too el proyectu, First we take Manhattan, ta versionado de Fernando Marín (Mockin'byrds y La Ruta). Finalmente, Mar y Alicia Álvarez (Pauline en la playa) revisitaron Dance to the end of love cola so particular visión.

    Amás de la grabación del conciertu, la edición especial recueye'l documental First we take Milán, de Chus Neira y José Braña, qu'enceta la hestoria del campus d'El Milán de la Universidá d'Uviéu como puntu d'orixe nes trayectories musicales de dalgunos de los protagonistes del movimientu conocíu como'l Xixón Sound. El documental estrenose na última edición del Festival de Cine de Xixón.

    First we take Milán sirvió como tributu d'almiración al cantautor canadiense Leonard Cohen mientres la so estancia n'Uviéu'l pasáu ochobre y como oportunidá pa que dalgunos de los nomes más destacaos del Xixón Sound realcontrárense veinte años dempués.

    Imaxes:


Buscar