Noticias

  • La Universidá d'Uviéu desenvuelve un proyectu pioneru pa midir la calidá del aire

    03 de Abril 2014

    La midida realízase utilizando liquen biosensores como una alternativa eficaz y sostenible frente a otros métodos convencionales.

    Liquen nel tueru d'un árbol cola central térmica al fondu.

    Un equipu d'investigadores de la Universidá d'Uviéu trabaya con EDP nun innovador proyectu pa emplegar distintos tipos de liquen como biosensores ambientales. Ye una esperiencia pionera nel Principáu que foi sofitada pola Conseyería d'Economía y Empléu al traviés de les sos ayudes a empreses pa la execución de proyectos d'I+D+i.

    El catedráticu d'Ecoloxía de la Universidá d'Uviéu, José Ramón Obeso, coordina los trabayos qu'empezaron a desenvolvese a finales de 2013. L'empléu de liquen como sensores atmosféricos ye unu de los oxetivos prioritarios del estudiu. Pa llogralo, l'equipu empobináu por Obeso ta siguiendo'l rastru de la Xanthoria parietina, un liquen de color mariellu especialmente resistente a distintos elementos.

    Los liquen son organismos que tomen los sos nutrientes del aire de manera pasiva. Nun pueden evitar la so entrada nin espulsalos. Les poblaciones de Xanthoria parietina crecen a ritmu bien lentu, según esplica Obeso, polo qu'una presencia destacada d'esti liquen nuna determinada zona dexaría analizar la concentración de ciertos elementos químicos que se fueron atropando nun periodu de tiempu relativamente llargu. "L'analís detalláu d'estos liquen en distintes localidaes va dexanos saber cómo ta distribuyida la concentración de distintos elementos nel territoriu", señala'l catedráticu d'Ecoloxía.

    L'usu de liquen como bioindicadores dexa, per una parte, simplificar los procesos de sensorización ensin esplegar costosos equipos y aprovechar asina los servicios que pueden emprestar los ecosistemes a la sociedá; y, per otra parte, dexa determinar el nivel de contaminación en puntos nos que nun esisten sistemes automáticos de midida.

    Un procesu natural

    Los liquen son recoyíos en zones nes que la contaminación atmosférica ye bien baxa. Los investigadores recoyeron liquen de la especie Pseudevernia furfurácea en zones de monte como Picos d'Europa. Una vegada recoyíos repártense n'once aparques de siguimientu de la contaminación na zona central d'Asturies. Ellí, introdúcense dientro d'unes malles que dexen la llibre circulación del aire, de tal manera que los liquen puedan absorber los elementos.

    Los investigadores revisen caúna de les estaciones una vegada al mes pa dir comprobando en qué midida van atropándose los elementos de referencia y en qué momentu enchen los liquen. Si se diera esta situación tendríen de camudalos por otros exemplares.

    Un pasu importante del procesu ye l'analís nel llaboratoriu de les concentraciones de cada sustanza. L'equipu del catedráticu de Química Analítica José Ignacio Alonso va ser l'encargáu d'afinar al máximu les midíes que dexen detectar concentraciones d'inclusive nanogramos.

    Poner a puntu el métodu

    El proyectu pretende poner a puntu un métodu que dexe realizar midíes calidable del aire utilizando los liquen como bioindicadores.

    Si'l proyectu llogra les resultancies esperaes, el siguiente pasu sería buscar la estandarización del métodu. Futures investigaciones taríen dirixíes al aislamientu d'un clon de liquenes que dexe homogeneizar el procesu y ponelo a disposición comercial pa realizar les midíes de forma estandarizada.

    Equipu investigador

    • José Ramón Obeso
    • José Ignacio García Alonso
    • Mariella Moldován
    • Jorge Álvarez Sostres

    Imaxe de portada

    Exemplares de Xanthoria parientina y Pseudevernia furfurácea, los dos tipos de liquen utilizaos na investigación.


Buscar