Noticias

  • La Universidá d'Uviéu da la bienvenida a los estudiantes Erasmus

    03 de Setiembre 2012

    Más de 500 alumnos del programa de movilidá van cursar anguaño los sos estudios n'Asturies

    Alumnáu del programa Erasmus nel Campus del Milán

    La Selmana de Bienvenida a los Estudiantes Erasmus entamada pol Vicerrectorado de Internacionalización y Posgráu al traviés de la Casa de les Llingües empezó esta mañana nel Campus del Milán cola presentación de les actividaes, a la qu'allegaron alredor d'un centenar d'alumnos estranxeros.

    La vicerrectora de Internacionalización y Posgráu, Covadonga Betegón, la directora de la Oficina de Internacionalización, Leticia Santos, y la directora de la Casa de les Llingües, Marta Mateo, fueron les encargaes de dar la bienvenida a los mozos y moces, qu'a lo llargo de tola selmana participarán en distintes actividaes que los ayudarán a integrase na Universidá y tamién los averen a la realidá social y el costumes d'Asturies.

    Covadonga Betegón aprofió a los estudiantes que les puertes del vicerrectorado y de la Universidá "van tar abiertes pa resolver cualquier problema que tengáis" y deseyó-yos una prestosa estancia na institución académica asturiana.

    La Universidá d'Uviéu va recibir anguaño alredor de 500 alumnos Erasmus de los distintos países europeos. Alemanes, italianos, franceses ya ingleses son les nacionalidaes más numberoses ente los alumnos que lleguen a Uviéu, según destacó Leticia Santos, quien amás apuntó una medría significativa nel númberu d'alumnos que lleguen dende países como Polonia y Turquía.

    Per otru llau, más de 600 alumnos de la Universidá d'Uviéu van cursar estudios fora de les aules asturianes gracies al programa Erasmus, una medría d'un 10 per cientu al respective de les cifres del pasáu añu. El númberu de places y la diversidá de centros amplióse sustancialmente anguaño gracies a la firma de 90 nuevos alcuerdos con más d'una ventena d'universidaes europees.

    La proyección internacional que la Universidá d'Uviéu impulsó nos últimos años revirtió nuna importante medría de les movilidaes del so alumnáu, que complementen la so formación con una estancia nel estranxeru. Alredor de 2.000 alumnos fixeron anguaño les pruebes d'idioma pa optar a una beca Erasmus.

    La Escuela Politécnica d'Inxeniería de Xixón, la Facultá d'Economía y Empresa, la Facultá de Derechu y la Facultá de Filosofía y Lletres son los centros que más alumnos unvien d'Erasmus y tamién los que más estudiantes van recibir esti cursu.

    Amás de toles actividaes emponedores de la Selmana de Bienvenida a los estudiantes Erasmus, tamién se ponen en marcha los programes A-DUO y Tándem, dos iniciatives que fomenten la relación ente los alumnos del centru d'orixe y los estudiantes internacionales pa emprestar sofitu a los nuevos alumnos y ameyorar el nivel d'idioma de dambos.

    Imaxes:


Buscar