Noticias

  • La Universidá d'Uviéu confirma'l sellu de Campus d'Excelencia Internacional

    13 de Payares 2014

    El plan estratéxicu Ad Futurum supera la evaluación final de la comisión internacional d'espertos y llogra la acreditación de forma permanente.
    L'informe provisional destaca'l potencial de la institución académica pa contribuyir al desenvolvimientu económico y social de la rexón

    Miembros del equipu rectoral

    La Universidá d'Uviéu llogró la acreditación definitiva como Campus d'Excelencia Internacional, en superando l'exame final de la comisión internacional d'espertos qu'evalúa los Campus d'Excelencia de les universidaes españoles. A la espera del dictame oficial del Ministeriu d'Educación, Cultura y Deporte que se va faer públicu n'avientu, l'informe provisional confirma'l sellu pa la Universidá d'Uviéu pol progresu significativu" del plan estratéxicu Ad Futurum dende la so puesta en marcha en 2009.

    El rector, Vicente Gotor, y la vicerrectora d'Investigación y Campus d'Excelencia Internacional, Paz Suárez Rendueles, presentaron públicamente esta mañana la resultancia de la evaluación arropaos pol restu del equipu rectoral. Dambos estimaron al conxuntu de la sociedá asturiana'l respaldu emprestáu a Ad Futurum dende'l so entamu. "Ye un ésitu de toos", aprofió'l rector, quien aseguró que se va siguir trabayando nes iniciatives incluyíes nel proyectu estratéxicu. "Nun vamos quedar equí", aportunó Vicente Gotor.

    El dictame de la comisión internacional d'espertos de reconocíu prestíu implica la concesión definitiva del sellu a la Universidá d'Uviéu, ensin que tenga de sometese a evaluaciones añales p'anovar la acreditación. Los espertos destaquen especialmente'l desenvolvimientu y modernización de la docencia y l'investigación; les "bones resultancies" del plan de billingüismu; y la medría de la collaboración internacional, especialmente en publicaciones científiques en revistes d'impactu y en proyectos d'investigación conxuntos.

    L'informe provisional inclúi como fortaleces la participación activa de les empreses de la rexón nes iniciatives de Ad Futurum, el trabayu realizáu p'ameyorar la empleabilidá de los estudiantes, l'amenorgamientu significativu del impactu medioambiental y, a última hora, "el bon desenvolvimientu de la xestión de la Universidá y la concentración d'esfuerzos".

    Los espertos valoren tamién l'impactu potencial del Campus d'Excelencia Internacional nun modelu de desenvolvimientu social y territorial, qu'incidió nel tresformamientu de la posición de la Universidá d'Uviéu n'Asturies, y que puede contribuyir a la crecedera económica de la rexón y del país.

    El proyectu Ad Futurum. Del XVII al XXI: Proxectando la nuesa tradición escontra'l futuru llogró'l sellu d'excelencia na primer convocatoria del programa, en 2009, al pie de otros ocho universidaes españoles. Magar la falta de convocatories nos últimos años y los retayos económicos, el Campus d'Excelencia Internacional consiguió autofinanciarse y captar fondos esternos d'empreses ya instituciones pa siguir desenvolviendo actuaciones en meyora docente y científica, tresferencia de conocencia, modernización de campus y relación cola sociedá.

    Los clusters d'Enerxía, Medioambiente y Cambéu Climáticu y de Biomedicina y Salú contribuyeron a amontar notablemente la participación de la Universidá d'Uviéu en proyectos europeos competitivos, ente que'l Centru Internacional de Posgráu hai promovido una renovación fonda de los másteres universitarios ya impulsáu la internacionalización al traviés de los másteres Erasmus Mundus.

    La vicerrectora d'Investigación y Campus d'Excelencia Internacional concluyó la so intervención destacando'l lideralgu del rector, "que tuvo impulsando esta barca", de too l'equipu rectoral. Amás, tuvo una alcordanza pa la participación nel proyectu de los exvicerrectores Carlos Ricu y Ana Fernández García, y de la primer directora de la oficina del CEI, Silvia Gómez Ansón.

    Imaxes:


Buscar