Noticias

  • La Universidá d'Uviéu collabora cola CRUE y la Fundación ONCE pa impulsar l'accesibilidá universal nos currículos formativos

    03 de Payares 2014

    Investigadores de los Departamentos de Ciencies de la Educación y Psicoloxía tomen parte nel proyectu Formación Curricular en Diseñu pa toles persones al pie de docentes de 17 universidaes españoles

    El grupu de trabayu cola coordinadora del proyectu mientres la presentación.

    La Conferencia de Rectores de les Universidaes Españoles (CRUE) y Fundación ONCE presentaron güei en Madrid el proyectu Formación Curricular en Diseñu pa toles persones, una iniciativa cola que van introducir los conceutos básicos del diseñu pa toos y l'accesibilidá universal nos currículos formativos de los estudios universitarios d'Alministración y Dirección d'Empreses, Derechu, Medicina, Pedagoxía, Psicoloxía y Trabayu Social.

    L'actu de presentación cuntó coles intervenciones del presidente de la CRUE, Manuel José López Pérez, y del vicepresidente executivu de Fundación ONCE, Alberto Durán. Al eventu, presentáu pola comisionada pa Universidá, Mocedá y Planes Especiales de Fundación ONCE, Isabel Martínez Lozano, tamién asistieron el director d'Accesibilidá Universal de Fundación ONCE, Jesús Hernández, y la coordinadora del Grupu de Trabayu de Discapacidá de la Rede Universitaria d'Asuntos Estudiantiles (RUNAE) de la CRUE, Ángela Barrios.

    La Universidá d'Uviéu participa nel proyectu al traviés de los los grupos de trabayu de los Graos en Pedagoxía y Psicoloxía nos que tomaron parte el profesores Alejandro Rodríguez Martín (Departamentu de Ciencies de la Educación) y Laura Y. Gómez Sánchez (Departamentu de Psicoloxía). Dambos participaron viviegamente nel diseñu d'esta propuesta curricular pa los sos respectivos graos col fin de formar profesionales que tengan en cuenta la discapacidá, y apliquen les sos conocencies pa diseñar y emprestar servicios dafechu inclusivos.

    La iniciativa cunta cola collaboración de la Comisión Académica Sectorial de les Universidaes Españoles (CASUE) y la Rede Universitaria d'Asuntos Estudiantiles (RUNAE). Nella, participaron 30 docentes de 17 universidaes españoles, y más d'un centenar de profesionales espertos na materia, con cuenta de la diversidá de les persones sía tenida en cuenta dende'l primer momentu en que se concibe y diseña un productu, bien o serviciu.

    L'oxetivu del proyectu, coordináu por Maribel Riolo, ye desenvolver ferramientes pa introducir los conceutos básicos de diseñu pa toles persones y accesibilidá universal nos currículos formativos de seis carreres universitaries, teniendo en cuenta tantu l'aprendizaxe como les competencies que l'alumnáu tien d'adquirir pal exerciciu de cada oficiu concretu na so relación coles persones con discapacidá, los sos derechos, les sos necesidaes, cómo resolveles, o cómo investigar nesta materia, ente otres cuestiones. Por ello, los seis publicaciones que se presenten, frutu d'esti proyectu, son una ferramienta por que les universidaes españoles puedan impulsar la inclusión del diseñu pa toos nos currículos de la formación universitaria, cumpliendo asina les directives europees nesta materia.


Buscar