Noticias

  • La Universidá d'Uviéu celebra la tercer edición del Girl's Day

    23 de Febreru 2012

    La xornada va tener llugar el 27 de febreru de 2012, na Escuela Politécnica d'Inxeniería de Xixón.

    Logotipu

    La Escuela Politécnica de Xixón va acoyer, el llunes, 27 de febreru de 2012, la celebración de la tercer edición del Girl´s Day. Esta iniciativa, entamada pola Universidá d'Uviéu y la Fundación Universidá d'Uviéu, tien como oxetivu averar los estudios técnicos al alumnáu, espertar el so interés pola Ciencia y Tecnoloxía y amontar el númberu de muyeres que se matriculen nesti tipu de titulaciones.

    Mientres la xornada, ta previstu que s'axunten nel campus xixonés más de 200 alumnos d'ESO y Bachilleratu. Los estudiantes van asistir a una mesa redonda y van realizar visites empuestes a los llaboratorios de la Escuela Politécnica d'Inxeniería de Xixón.

    La inauguración oficial del Girls' Day va tener llugar, a les 10:00 hores de la mañana, na Aula Magna del Edificiu Polivalente del Campus de Xixón. L'actu va cuntar cola presencia del rector de la Universidá d'Uviéu, Vicente Gotor Santamaría; de l'alcaldesa de Xixón, Carmen Moriyón Entrialgo; del vicerrector d'Estudiantes y Empléu, Luis Rodríguez Muñiz; del vicerrector d'Investigación, Santiago García Granda; y del director de la Escuela Politécnica d'Inxeniería de Xixón, Hilario López García.

    El Girls' Day ye una iniciativa d'ámbitu internacional que tamién se desenvuelve en países como Estaos Xuníos, Alemaña, Holanda, Luxemburgu o Suiza.


Buscar