Noticias

  • La Universidá d'Uviéu celebra'l mediu sieglu del so equipu de fútbol

    09 de Mayu 2012

    El programa d'actos del aniversariu inclúi una esposición retrospectiva sobre l'equipu, partíos amistosos con plantiyes del Real Sporting y el Real Uviéu y una comida d'hermandá

    Equipu de fútbol masculino que xuega na Tercer División

    L'equipu de fútbol de la Universidá d'Uviéu cumple mediu sieglu y l'institución académica asturiana va celebrar esti importante aniversariu con un completu programa d'actos. Les bodes d'oru del Uni van conmemorarse a partir del llunes 14 de mayu cola inauguración d'una esposición titulada 50 años de fútbol universitario.

    L'amuesa va poder visitase hasta'l vienres 19 de mayu na Sala d'Esposiciones del Centru Cultural LAUDEO (C/San Francisco, 1). Pa configurar la retrospectiva d'esti mediu sieglu d'hestoria del club s'arrexuntaron y escoyeron un centenar de fotografíes que dan testimoniu de les xeneraciones que pasaron poles files del Uni. Mientres meses, los responsables de la organización contactaron con exjugadores, técnicos, aficionaos y periodistes que nestos 50 años siguieron al equipu pa pidir la cesión de les sos fotografíes personales.

    La esposición va esibir tamién dalgunos de los trofeos más destacaos que conquistó l'equipu nesti mediu sieglu como'l del Campeonatu d'España Universitariu, el Campeonatu de Lliga de 3ª División o'l Troféu Emma Cuervu. Los visitantes tamién van poder ver cómo evolucionó la equipación del Uni nestos 50 años cola exhibición de delles de les camisetes más emblemátiques del conxuntu universitariu.

    Partíos y comida d'hermandá

    El fútbol ye'l protagonista irremediable de la celebración de los 50 años de la Universidá. Asina, el vienres 18 de mayu, a partir de les 18:00 hores, nel Estadiu de San Gregorio (Campus de El Catalanes) van enfrentase les primeres plantiyes del Real Sporting de Xixón y l'Universidá d'Uviéu.

    El sábadu 19 de mayu va ser la vez de los veteranos del Uni, qu'a partir de les 11:30 hores van midirse a un combináu de exjugadores del Real Uviéu, tamién en San Gregorio. El broche d'oru a les xornaes de celebración sedrá una gran comida d'hermandá na que exjugadores, técnicos y personal venceyáu al equipu universitariu van esfrutar del alcuentru pa conmemorar los 50 años de vida del conxuntu universitariu. Tolos comenenciudos n'allegar a la comida pueden inscribise o solicitar información al traviés del corréu electrónicu cau50aniversariouniovi.es o llamando al teléfonu 660998732.


Buscar