Noticias

  • La Universidá d'Uviéu presenta 42 Másteres Universitarios na so ufierta de formación de posgráu pal cursu 2011-2012

    29 de Abril 2011

    El 1 de mayu empieza la preinscripción d'unos estudios que, nun altu porcentaxe, van tener docencia n'inglés y facilidaes pa la movilidá del alumnáu.

    El Centru Internacional de Posgráu (CIP) de la Universidá d'Uviéu tien llista la propuesta de los 42 Másteres Universitarios que van integrar la so ufierta formativa pal cursu 2011-2012. Un elencu d'estudios que pretende favorecer la cooperación interuniversitaria, la participación empresarial y la internacionalización de los estudios de segundu ciclu.

    Nesa ufierta tán representaes les árees de conocencia de les ciencies, ciencies de la salú, ciencies sociales y xurídiques, arte y humanidaes ya inxeniería y arquitectura. Tamién se van impartir trés másteres col sellu Erasmus Mundus. Un altu porcentaxe d'estos estudios de posgráu van cuntar con docencia n'inglés y facilidaes pa la movilidá de los estudiantes. Van Cuntar, coles mesmes, con práctiques en centros esternos y participación de profesionales y académicos de prestíu en cada sector. Les metes tán puestes na alquisición d'una formación avanzao y especializao, con una clara orientación al exerciciu y promoción profesionales o, nel so casu, a la investigación.

    Estos estudios varien ente una duración mínima de 60 y una máxima de 120 creitos ECTS (unu o dos cursos académicos a tiempu completu), tres que la so finalización llógrase la titulación oficial de Máster Universitariu. Los precios entá tán pindios d'aprobación definitiva; puede avanzase que van predominar los de cuantíes de 26 a 30 euros per creitu, precios que se doblen pa estranxeros non residentes na Unión Europea, sacantes se trate d'estudiantes suxetos a conveniu.

    Ente'l 1 y el 15 de mayu van poder presentase les solicitúes en primer convocatoria, que les sos llistes d'almitíos van apaecer el día 30 del mesmu mes. Va Haber una segunda convocatoria, ente'l 13 de xunu y el 10 de xunetu, con publicación de llistes d'almisión el 26 de xunetu. El periodu de matrícula afitóse ente los díes 30 d'agostu y 9 de setiembre.

    Documentos Rellacionaos:

    Enllaces Rellacionaos:


Buscar