Noticias

  • La Universidá d'Uviéu aprueba la ufierta de places n'estudios de grau pal próximu cursu

    30 de Abril 2014

    El Conseyu de Gobiernu afita tamién el calendariu de preinscripción y matrícula nes titulaciones. El rector defende la conxelación de tases académiques en primer matrícula per tercer añu consecutivu

    El rector y el vicerrector d'Estudiantes, tres el Conseyu de Gobiernu

    El Conseyu de Gobiernu de la Universidá d'Uviéu aprobó la ufierta de places pa l'almisión d'estudiantes nos sos centros y enseñances pal cursu 2014-2015. El rector, Vicente Gotor, y el vicerrector d'Estudiantes, Luis Rodríguez Muñiz, presentaron los principales datos del procesu d'accesu a los estudios universitarios pal próximu cursu, nel que cuatro graos se suman a la llista de titulaciones qu'afiten una llende d'accesu en primer cursu.

    Inxeniería Informática del Software, con 150 places, Física (55 places), Matemátiques (35) y el doble grau en Matemátiques y Física (60 places) establecen numerus clausus. El rector y el vicerrector d'Estudiantes esplicaron qu'esta midida deber nunos casos a la imposibilidá de contratar profesoráu y n'otros por llimitaciones d'espaciu p'atender a más estudiantes.

    En total, una ventena de graos universitarios tienen acutáu l'accesu. Los estudiantes que deseyen matriculase en graos con numerus clausus van tener que realizar preinscripción y, darréu, una vegada almitíos, formalizar matrícula. La primer fase pa solicitar plaza en centros con llende d'accesu va ser del 16 de xunu al 4 de xunetu, ente que la matrícula pa estudiantes en graos con almisión directa va ser del 1 de xunetu al 22 d'agostu (ver más información en documentos rellacionaos).

    Amás, tres la xunta del Conseyu de Gobiernu, el rector indicó que dende la Universidá d'Uviéu volverá proponese al Principáu la conxelación de la primer matrícula per tercer añu consecutivu, una decisión que tien de tomar el Gobiernu rexonal.


Buscar