Noticias

  • La Universidá d'Uviéu acueye'l simposio "Understanding and fighting metastasis"

    25 de Mayu 2011

    Científicos de distintos países participen nuna xunta de trabayu del proyectu européu MicroEnviMet del Séptimu Programa Marco.

    La Universidá d'Uviéu celebra una xunta científica d'especialistes na llucha contra'l cáncer que formen parte de MicroEnviMet, un proyectu européu del Séptimu Programa Marco que plantega enfoques innovadores na comprensión y la llucha contra la metástasis. L'alcuentru ta entamáu pol catedráticu de Bioquímica y Bioloxía Molecular de la Universidá d'Uviéu, Carlos López-Otín, y pola profesora de Bioloxía Molecular y Celular de la Universidá de Lieja (Bélxica), Agnès Noel, miembru del Laboratoire de Biologie deas Tumeurs et du Développement (LBTD) y coordinadora del proyectu.

    MicroEnviMet ("Entender y torgar la metástasis por aciu la modulación del microentorno del tumor interviniendo na rede de la proteasa") tien l'oxetivu doble d'entender meyor el mecanismu d'espardimientu de los cánceres nel cuerpu y desenvolver nuevos métodos pa torgar esti procesu alteriando'l microentorno del tumor.

    Nesti proyectu participen espertos de Francia, Italia, Alemaña, Bélxica, Finlandia, Dinamarca y Eslovenia, amás del equipu de López-Otín na parte española. L'alcuentru cunta col sofitu del Campus d'Excelencia Internacional de la Universidá d'Uviéu, al traviés del Cluster de Biomedicina y Salú.

    Enllaces Rellacionaos:


Buscar