Noticias

  • La Universidá abre una nueva edición de ‘La Escena Contemporanea' con cuatro espectáculo nacionales

    28 de Xineru 2014

    L'amuesa, entamada en collaboración col Conceyu d'Uviéu, ufierta dalgunes de les obres de teatru y danza más destacaes nel circuitu español

    Un momentu de Pequenos actos pseudorevolucionarios.

    La Universidá d'Uviéu abre, a partir del xueves 30 de xineru, una nueva edición de La Escena Contemporanea (III Amuesa de Teatru Contemporaneu) con cuatro espectáculo nacionales. L'amuesa de teatru, entamada pola institución académica en collaboración col Conceyu d'Uviéu, va traer al Teatru Filarmónica dalgunes de les producciones que percuerren los principales circuitos escénicos del país, con entrada llibre hasta completar l'aforu.

    Tres la estraordinaria acoyida de los dos ediciones anteriores, La Escena Contemporanea ufierta una vegada más al públicu asturianu dalgunos de los espectáculos más destacaos del teatru y la danza de los nuesos díes, con ventureres puestes n'escena y temátiques d'interés social: teatru pa esfrutar y pa pensar. Toles funciones van celebrar nel Teatru Filarmónica a les 20:00 hores.

    L'espectáculu ULTRAinocencia, de la compañía catalana loscorderos.sc, estrenáu n'ochobre de 2013, inaugura l'amuesa'l xueves 30 de xineru, nun apueste que combina teatru testual, teatru d'oxetos, danza, acrobacia, clown… Lo que plantega la compañía ye "un teatru empobináu al instintu". David Climent y Pablo Molineru, na dirección ya interpretación, ponen n'escena una obra "pa ver que tou ye una ficción y dexar de lluchar contra la realidá. Pa nun cree-y la; pa crear otra".

    La nueche delantre de los montes, una adaptación de la obra escrita pol dramaturgu francés Bernard-Marie Koltès (1948-1989), llega al Teatru Filarmónica'l 13 de febreru de la mano de Microbiana Teatru y nuna versión de Pedro Víllora. L'actor y fundador de la compañía, Mario Benítez, toma la escena pa retratar a un personaxe ensin nome que plantega'l discursu d'un estranxeru na so soledá dientro de la urbe francesa.

    Pequenos actos pseudorrevolucionarios, de la compañía Ibuprofeno Teatru, ye la tercer cita con La Escena Contemporanea, el 20 de febreru. Marián Bañobre y Santiago Cortegoso xuben a les tables un espectáculu risible-políticu-absurdu basáu en testos escritos a partir d'un procesu d'investigación y creación colectiva, protagonizaos por dos personaxes que deciden entamar acciones de protesta pa espresar el so desalcuerdu col funcionamientu o'l significáu de dalguna institución pública o privada. Sobre l'escenariu, una estética orixinal, que recrea l'universu de los xuegos de la infancia, con clicks de Famóbil o billetes del monopoly.

    Bach cierra la III Amuesa de Teatru Contemporaneu Universidá d'Uviéu, el 27 de febreru, de la mano de la compañía Mal Pelo. La obra funde'l baille contemporaneu de María Muñoz, Premiu Nacional de Danza en 2009, cola Clave bien temperado de J.S. Bach, interpretáu por Glenn Gould. Nel espectáculu, Muñoz ye un puntu negru en contraposición col escenariu vacíu y blancu. Esta función suma yá más de 80 representaciones dende'l so estrenu en 2004 n'Europa, EEXX, Suramérica y Oriente Próximu.

    Imaxes:


Buscar