Noticias

  • La Universidá abre'l X Alcuentru de los Servicios d'Información y Orientación Universitarios

    05 de Mayu 2011

    Esta edición, que va emprestar especial atención a la relación ente la Universidá y la Formación Profesional, axunta n'Uviéu a representantes de distintes universidaes españoles y del Ministeriu d'Educación.

    Inauguración X Alcuentru SIOU

    La Universidá d'Uviéu inauguró esta mañana'l X Alcuentru de los Servicios d'Información y Orientación Universitarios, que va dedicar especial atención a la relación ente la Formación Profesional (FP) y l'Universidá. Nel actu d'apertura intervinieron el conseyeru d'Educación y Ciencia, Herminio Sastre; el vicerrector d'Estudiantes y Empléu, Luis Rodríguez Muñiz; y el coordinador del Grupu de Servicios d'Información y Orientación Universitarios (SIOU), Fermín Martín.

    El vicerrector d'Estudiantes de la Universidá d'Uviéu punxo de relieve la necesidá de dexar d'aldericar sobre si hai munchos o pocos estudiantes qu'opten pola FP o por una carrera universitaria y empezar a ver que "lo importante ye que cada vez haya más estudiantes qu'opten pola educación cimera, yá sía na Universidá o na FP". Amás, Luis Rodríguez Muñiz abogó por que cada vez haya menos barreres pa facilitar el pasu ente la FP y l'Universidá y viceversa.

    Nesti alcuentru, que se va enllargar hasta'l vienres, participen especialistes de distintes universidaes españoles y representantes del Ministeriu d'Educación. Mañana vienres, Mercedes Chacón, Directora Xeneral d'Atención, Participación y Empleabilidá del Estudiante Universitariu del Ministeriu d'Educación, va ufiertar una ponencia sobre la relación ente la FP y l'Universidá, a les 9:30 hores na Aula Gradiada del Edificiu Históricu.

    A lo llargo de dos díes, van encetase distintos temes como l'accesu a la Universidá, reconocencia de creitos, posibilidaes d'orientación al traviés de los Tics, les esperiencies de los Campus d'Excelencia Internacional dientro del Subprograma de Fortalecimientu, y l'espardimientu del estatutu del estudiante universitariu.

    La clausura celebrarase mañana a les 14:00 hores cola intervención de Juan José Sánchez Navarro, director Xeneral de Polítiques Educatives, Ordenación Académica y Formación Profesional del Principáu d'Asturies; Fermín Martín, coordinador del Grupu SIOU, Universidá de La Laguna; y Luis Rodríguez Muñiz, vicerrector d'Estudiantes y Empléu de la Universidá d'Uviéu.

    Imaxes:

    Enllaces Rellacionaos:


Buscar