Noticias

  • La Universidá Asturiana de Branu fai entrega de los sos diplomes nun actu celebráu nel Paraninfo

    22 de Setiembre 2016

    El rector de la Universidá d'Uviéu aboga por normalizar l'usu de la llingua na institución académica asturiana

    Un momentu de la entrega de diplomes de la UABRA

    La Universidá d'Uviéu fixo entrega de los diplomes a los estudiantes que participaron na Universidá Asturiana de Branu (UABRA), nun actu celebráu nel Paraninfu. El rector de la institución académica asturiana, Santiago García Granda, presidió la ceremonia acompañáu pol conseyeru d'Educación y Cultura, Genaro Alonso; la presidenta de l'Academia de la Llingua, Ana Cano; la teniente d'alcalde de Cangas, Laura Álvarez García; y el secretariu de los cursos, Xosé Ramón Iglesias Cueva.

    Más d'ochenta estudiantes participaron esti branu nos cursos ufiertaos pola Academia de la Llingua Asturiana y l'Universidá d'Uviéu, al traviés del vicerrectorado d'Estensión Universitaria y Proyección Internacional, en Cangas. Na pasada edición la UABRA impartió distintos programes nos que s'apurrieron los diplomes: Cursu Elemental de Llingua Asturiana; Cursu Avanzáu de Llingua Asturiana; Cursu de capacitación en Gallego-Asturianu na so segunda fase, cursos d'Afondamientu; Cursu de Capacitación pa la Traducción al Asturianu; Internet y Escuela, un enfoque práuticu: Xuegos y tradiciones populares asturianes; y Ecoloxía y Mediu Ambiente n'Asturies.

    Na vez d'intervenciones, la presidenta de l'Academia de la Llingua, Ana Cano, estimó la collaboración de la Universidá d'Uviéu na cita añal de la UABRA. Solicitó al rector que l'asturianu sía una llingua d'usu normal na Universidá, y reivindicó ante'l conseyeru la oficialidá de la llingua. Pela so parte, Genaro Alonso, conseyeru d'Educación y Cultura, ratificó'l compromisu del so departamentu cola llingua como patrimoniu de los asturianos, ente que la teniente d'alcalde de Cangas punxo de relieve'l beneficiu y visibilidá que la UABRA apurre al conceyu.

    El rector cerró l'actu con un discursu íntegru n'asturianu, nel qu'abogó por normalizar l'usu la llingua na Universidá d'Uviéu. Nesti sentíu, indicó que se va ameyorar la calidá académica del Minor, y va facilitase la defensa de los Trabayos Fin de Grau y Fin de Máster n'asturianu y n'otres llingües. La institución académica, añedió, empezó a potenciar la identidá corporativa trillingüe –español, asturianu ya inglés- aplicada yá al calendariu académicu y documentos oficiales, y que se va estender na señalización de los espacios. Amás, anunció que se van promover cursos formativos d'asturianu pa docentes, estudiantes y personal d'alministración y servicios.

    Imaxes:

    Documentos Rellacionaos:


Buscar